Parliament eyisizza embalirira eyenyongereza ya buwumbi 617, mu mwaka gw’ensimbi guno 2021/2022 ogusigaddeko omwezi gumu okuggwako.
Okusaba kuno kwanjuddwa minister omubeezi ow’ensimbi Henry Musaasasi.
Ku mbalirira eyenyongereza eno, ministry y’obwa president eyagalako obuwumbi 86, zino nti zakuvugirira ekitongole kya science and technology.
Ensimbi obuwumbi 77 zakugenda mu nsawo etatunulwamu emanyiddwanga ‘classified budget’ eyamaka gobwa President.
Ministry yebyokwerinda erinako obuwumbi 152 nga kuzo obuwumbi 64 zigenda kuvugirira ebikwekweto bya UPDF mu Democratic Republic of Congo, ebyatuumibwa Operation Shujja UPDF byerimu okulwanyisa bannalukalala ba ADF.
Obuwumbi 87 zakuvugirira ebikwekweto bya UPDF mu Karamoja okulwanyisa ababbi b’ente.
Obuwumbi 215 bwakusasula emisaala gy’abakozi baayo , songa obuwumbi 21 bwakuliyirira bannanyini ttaka government lyeyezza.
Ekitebe ky’obuyisiraamu ki Uganda muslim Supreme Council government egenda kukiwa obuwumbi 2.5, okuteekateeka okulonda kwobukulembeze bw’Obuyisiraamu.
Akawumbi 1 kakuweebwa essaza lye FortPortal, so nga obukadde 600 bwakuweebwa obulabirizi bwa Greater Ankole okuteekateeka emikolo gy’olunaku lw’abajulizi e Namugongo.
Wadde ng’embalirira eno eyennyongereza eyisiddwa parliament, ababaka abamu naddala ab’oludda oluvuganya, bemulugunyizza nti tegoberedde mitendera mituufu.
Bagamba nti akakiiko akakola ku byembalirira tekasoose kukola alipoota ku mbalirira eno nga tenayisibwa, era nti n’ababaka tebaweereddwa budde kugikobaganyako birowoozo.
Omubaka wa Budadiri West Nathan Nandala Mafaabi abuuzizza minister engeri emisaala gy’abakozi gyegisobola okusabibwako embalirira y’ennyongereza, so ng’emisaala gyalambikibwa mu mbalirira eyawamu
Wabula Minister Musaasizi agambye nti waliwo ba minister abaggya, abawi b’amagezi eri president Museven, bannamaggye abaalinnyisibwa amadaala, n’abakozi abalala abaawandiikibwa ng’embalirira emaze okuyisibwa.
