Government erabudde nti ssiyakuzza bujja ndagaano zekola n’ebitongole ne Kampuni zoobwananyini, ezitagoberera biruubirirwa biteekesa mu nkola manifesto yaayo, naddala okutuukiriza ebirooto ebyateekeddwa mu nnambika ya yaayo eyenkulakulana eya National Development plan ey’okuna (NDP IV).
Bino bikakasiddwa Dr. Alfred Okot Okidi, omuteesiteesi omukulu mu ministry y’ebyamazzi n’obutonde, bwabadde ku Serena Hotel mu Kampala, mu kutongoza alipoota ya kampuni ya Uganda Breweries Limited, (UBL), ekwata ku kubunyisa amazzi amayonjo mu bantu etuumiddwa UBL Sustainability Report.
Alipoota eraze nti UBL yaakasiga mu Uganda shilling akawumbi kamu neekitundu mu pulojekiti z’amazzi okwetoloola eggwanga lyonna.
Dr. Alfred Okot Okidi, agambye nti government erina ebirooto era endagaano zezze ekola zonna ne bannakyewa, ebitongole ne kampuni ebyobwananyini, ziruubirirwa kutuukiriza birooto ebyo mu National Development Plan IV, era naatendera aba Uganda Breweries okukwasizaako gavumenti mu nteekateeka eno.
Agambye nti kampuni n’ebitongole era birina okulowooza ku kuteekawo enkola ezinayamba abantu okusigala nga baganyulwa mu pulojekiti zebabawa, ng’abazitandise nebwebaba bavuddewo nga tebakyazivujjirira abantu basobola okuziyimirizaawo.
Alipoota ya Uganda Breweries Limitted, etunuulidde okugatta omutindo ku by’amaguzi ebikolebwa bannauganda, okufaayo ku byobulamu, okubunyisa amazzi amayonjo, ebyobulimi, nókutaasa obutonde bw’ensi.
Felicite Nson, ssenkulu wa UBL, agambye nti mukawefube wokuddiza ku bantu, basimye enzizi zaamazzi amayonjo naddala aga Nayikondo ezigasa abantu abasoba mu 1,100, okulakulanya obutale, okusomesa abantu enkozesa y’omwenge ennungamu, okuwagira abalimi naabasuubuzi nebirala.#
Bisakiddwa: Ddungu Davis
