Gilbert Arinaitwe Bwana omusirikale wa police asindikiddwa ku alimanda – avunaanibwa kukabasanya muwala

Omuserikale wa police Gilbert Arinaitwe Bwana asindikiddwa mu kkomera e Luzira, avunaanibwa emisango omuli okukabassanya omukoziwe n’okukukusa abantu nga bino bibaddewo mu mwaka guno 2023.

Omulamuzi omukulu owa kooti ya Buganda road Ronald Kayizzi yasindiseArinaitwe mu kkomera, ku bigambibwa nti yakakkana ku muwala owemyaka 23 n’amukaka omukwano.

Omuwala ono yamuggya mu district ye Ntungamo namutwala okukola mu makaage agasangibwa e Nalumunye Bandwe mu Town Council ye Kyengera.

Kigambibwa nti Arinaitwe yakaka omukyala ono omukwano emirundi egiwera 7, ekyamuwaliriza okuddukira mu balwanirizi b’eddembe ly’obuntu bamutaase.

Egimu ku misango egy’Okukabassanya omukyala n’Okukukusa abantu Gilbert Arinaitwe Bwana yagizza nga 23.6.2023.

Bwana abadde aleese abamweyimirira basatu okuli nnyina Olive Bwana , Sandy Nicholas naye musirikale wa police ate nga waluganda lwe, ne mukwano gwe John Patrick Lukwiya.

Wabula oludda oluwaabi nga lukulembeddwamu Ivan Kyazze lusabye omulamuzi nti Bwana aleme kuyimbulwa ku kakalu nti abadde ayinza okutaataaganya omusango, so nga era abadde taleese ndagamuntu wadde ebbaluwa ya LC ey’ekyalo gy’abeera.

Omulamuzi omusango agwongeddeyo okutuuka nga 18 August ,2023.

Arinaitwe Bwana yayitimuka nnyo mu mwaka gwa 2011, bweyakulemberamu okulwanyisa munnamagye Rt Col Dr Kiiza Besigye, bweyayasaayasa endabirwaamu za mmotokaye ye e Wandegeya nga akozesa emmundu kika kya Pistol.#