Katikkiro wa Buganda Charles Peter Mayiga akulembeddemu amatikkira gano agambye nti eky’obugagga Uganda kyerina bebavubukn nga n’olwekyo basaanye okuteekebwateekebwa n’okuluηamizibwa obulungi, basobole okufuuka ab’omugaso n’eggwanga okubaganyulwamu.
Agambye nti abavubuka balina okutendekebwa emirimu egy’ekikugu egivaamu ensimbi baleme kufuukira nsi eno kizibu.
Katikkiro ategeezezza nti ssinga abavubuka tebaluηamizibwa kimala ku Mirimu gyebakola , bandisomera obwereere.
Katikkiro asabye abatikkiddwa , okubeera ababaka b’Ettendekero lya Kabaka abalungi yonna gyebayita, olwo neekitiibwa kyettendekero kiguundiire.
Minister w’Ebyenjigiriza mu Bwakabaka Owek Chotilda Nakate Kikomeko,yebazizza Ssaabasajja olwokwagala ennyo Abaana be nabateerawo Ettendekero, ekiyambyeeko mu kulwaanyisa ebbula ly’Emirimu.
Owek Joseph Balikuddembe Ssenkusu nga ye ssenkulu wa Buganda Royal Institute of Business and technical Education Mengo, agambye nti Ettendekero lya Beene lino lyongedde okwojiwaza Abavubuka mu Mirimu gy’Emikono, n’Okukyusa endowooza zabwe ezitaali nnungi eri amasomo ago.
Owek. Ssenkusu atenderezza ebitongole by’Obwakabaka omuli CBS, BBS, BLB, ekitongole ky’Ebyobulambuzi n’ebirala ,ebiwagidde Ettendekero mu ngeri ezenjawulo, Omuli n’Okuwa abayizi ebifo nebafuna okutendekebwa.
Nyini Ntebe wa Boodi ya Buganda Royal Institute of Business and technical Education Mengo Dr. Kasozi Mulindwa ,asabye abayizi abatIkkiddwa okukuuma obwesigwa ssinga baba bafunye emirimu, n’Obutaswaaza kitiibwa Kya Bwakabaka.
