Bazzukulu ba Nsamba abe Ngabi ne bazukulu ba Lwomwa abe Ndiga besozze final y’emipiira gy’ebika bya Baganda egy’omupiira ogw’ebigere, bwe bawanduddemu bazukulu ba Namwana abe Kkobe ne bazukulu ba Kalibbala abe Nsenene ku mutendera gwa semifinal.
Omutendera gwa semifinal gukomekerezedwa mu kisaawe e Wankulukuku, nga Engabi Ensamba ekubye e Kkobe goolo 4-2 eza peneti oluvanyuma lw’okulemagana 0-0 mu dakiika 90.
Endiga nayo ekubye Ensenene goolo 4-2 eza peneti oluvanyuma lw’okulemagana goolo 1-1 mu dakiika 90.
Kakaano Engabi Ensamba egenda kuzuzumba ne Ndiga mu final egenda okubeerawo nga 07 June,mu kisaawe e Wankulukuku, ate nga e Kkobe ne Nsenene bakulwanira ekifo eky’okusatu.
Minister w’ebyemizannyo abavubuka n’ebitone Owek Ssalongo Robert Sserwanga yebazizza nnyo Omuteregga olw’emipiira gino egiyambye ennyo abavubuka okwolesa ebitone byabwe, era akunze Obuganda okujja mu bungi ku fayinolo.
Omukubiriza w’olukiiko lwa bataka era omukulu w’ekika kye Kkobe, Omutaka Namwama Augustine Kizito Mutumba, atenderezza omutindo ogulagiddwa abazukulu bonna mu ttiimu zabwe.
Omupiira gwetabiddwako Omutaka Fred Mayega omukulu w’ekika kye Nnyonyi Ennyange, Omutaka Kisolo Muwanga Ssebyoto omukulu w’ekika kye Nsenene, omumyuka w’omutendesi wa ttiimu y’eggwanga eya Uganda Cranes Omulangira Sam Ssimbwa Bamweyana, omutendesi wa ttiimu y’eggwanga eyabazannyi abatasusa myaka 17 eya Uganda Cubs, Brian Ssenyondo n’abalala bangi.
Bisakiddwa: Isah Kimbugwe
