Bazukulu ba Gabunga abe Mamba batandise bubi mu mpaka z’ebika bya Baganda ez’omupiira ogw’ebigere ez’omwaka guno bwe bakubiddwa bazukulu ba Nakirembeka abo Mutima Omusagi goolo 1-0.
Omupiira guno guzannyiddwa mu kisaawe kya Kibuli SS, goolo y’Omutima Omusagi etebeddwa Sseremba Joseph.
Emmamba Namakaka yekyasinze okuwangula engabo y’ebika emirundi emingi giri 10.
Mungeri yeemu ne bannantamegwa b’empaka z’ebika eza 2019 abe Mbogo, nabo batandise bubi bwe bakubiddwa e Kinyomo goolo 2-1.
Olulyo Olulangira lugudde maliri ne Nte goolo 1-1 ate nga Akasimba kakubye e Njobe goolo 5-0.
Ensenene ekubye e Mbwa goolo 1-0 etebeddwa Robert Ssewanyana, e Ngoonge egudde maliri ne Ngo 0-0 ate nga Ngaali akubye e Njaza goolo 1-0.
Bazukulu ba Nsamba bannantamegwa b’empaka z’omwaka oguwedde abe Ngabi batandise nabuwanguzi bw’ekubye e Nvuma goolo 1-0 etebeddwa Bruno Bunyaga.
Emmamba Kakoboza ekubye e Nkerebwe goolo 2-0 nga zonna zitebeddwa Nicholas Kabonge.
Bazukulu ba Ndugwa abeddira Olugave era nga bakawangula engabo eno emirundi 7,l nabo batandise nakugwa maliri ga 0-0 ne Omutima Omuyanja.
Empindi ekubye e Nvubu goolo 5-3, nga goolo ze Nvubu zonna 3 zitebeddwa Hudson Mbalire.
Bannantamegwa ba 2022 abe Ndiga bakubye e Njovu goolo 3-2, Engabi Ennyunga egudde maliri ne Nnyonyi Nnyange 0-0.
Engeye egudde maliri ne Kkobe 0-0 ku kisaawe kya Kawanda SS, ng’ omupiira guno gwetabidwako omukulu we kika kye Ngeye Omutaka Kasujju Kyesimba Kibirige Kakande Sheba ow’omunaana.
Bannantamegwa ba 2018 abe Nkima bakubye e Nnyonyi Endiisa goolo 2-1 ate nga e Nsuma ekubye Obutiko goolo 1-0.
Emipiira gino gizannyiddwa ku bisaawe okubadde Kibuli SS, Lubiri SS, Kawanda SS ne Kabaka Kyabaggu e Wakiso.
Okuddiηana kugenda kuberawo ku lwokuuna luno okufunako ttiimu 16 ezigenda ku mutendera gw’ebibinja.
Bisakiddwa: Isah Kimbugwe
