Ekisaalaate kya Nnabagereka 2023 kikomekkerezeddwa ku ssomero lya Muzza High School e Kabembe Mukono mu Kyaggwe.
Kimaze ennaku 16 nga kibangula abaana b’eggwanga ku mpisa , Ennono , Obuwangwa n’embeera z’abantu.
Ku mukolo guno Kamalabyonna wa Buganda Charles Peter Mayiga asabye abazadde okuba abasaale mu kunnyikiza empisa ezisaanidde mu baana, nga babatuuza nebabawabula mu ngeri esaana.
Katikkiro mungeri yeemu asabye abazadde okuwa abaana obudde bababuulire ebiba bibasomooza, nabo babayambeko okubigonjoola.
Ssentebe w’ekitongole ki Nnaabagereka Development Foundation Jeff Ssebuyiira, agambye nti obuntu bulamu bweyongedde mu baana ababadde mu Kisakaate, ekyongedde amaanyi mu mirimu gya Nnaabagereka.
Omubaka w’ekitongole ky’ensi yonna ekirafuubanira enkulaakulana ki United Nations Development Program Elsie Attafuah agambye nti Ekisakaate tekikomye kuyamba baana ba Buganda bokka , wabula n’amawanga amalala gaganyuddwamu, era galina bingi byebakiyigirako.
Omubaka wa Bungereza mu Uganda Kate Airey agambye nti ekisaakaate kya Nnaabagereka nabo bakyenyumirizaamu olw’okuteeka essira ku buntubulamu, nti kubanga busobola bulungi okulambika abantu, mu nsi emo ekyuka buli kadde ng’evugibwa technology.
Atwala essaza Kyaggwe Ssekiboobo Elijah Boogere aloopye abazadde ku nneeyisa ewabya abaana , naasaba Nnaabagereka ategekeyo ekisakaate ky’abazadde.
Omutandisi w’essomero lya Muzza High School Wilson Mukiibi Muzzanganda yeebazizza Nnaabagereka olwokufuba okuzza empisa mu baana, naye nayeeyama okuwagira ebyenjigiriza mu baana ba Buganda ne Uganda.
Nnaabagereka Sylvia Naginda akwasizza abasakaate abakize banaabwe ebirabo ebibasiima, nga muno mubaddemu abayizi abasinze obuto, abasinze empisa, abasinze okukyusa enneeyisa okuva lwebaagenda mu kisakaate n’abasinze okugunjula abasaakaate.
Bisakiddwa: Kato Denis