Ssaabasajja Kabaka Ronald Muwenda Mutebi II akwasizza bannantameggwa b’empaka z’omupiira gw’amasaza ga Buganda ab’omwaka guno 2025, ab’essaza Buweekula ekikopo kyebawangudde ne ceeke y’ensimbi obukadde 12.
Ssaabasajja asiimye naaggalawo empaka zino, wadde ng’abadde yakatonnya mu ggwanga okuva e Bungereza gy’abadde okumala wiiki nnamba.
Buweekula ewangudde Ssingo ku fayinolo y’empaka eyindidde mu kisaawe e Nakivubo.
Kino kye kikopo kya Buweekula kyesoose okuwangula mu mpaka zino.
Eggoolo ya Buweekula eteebeddwa omusambi Alex Talemwa mu kitundu ekyasoose, wabula nga wadde Ssinga eyolesezza omutindo omulungi mu kisaawe, tesobodde kugatta ku ggoolo eno.
Ssaabasajja Kabaka asiimye naakwasa Abazanyi ba Buweekula ekikopo, ate emidaali egyazaabu egyobuwanguzi jibakwasiddwa Katikkiro wa Buganda Charles Peter Mayiga.
Beene era asiimye neyeekubya ebifaananyi ne ttiimu yaabazanyi ba Buweekula abawangudde ekikopo kyabwe ekisoose, wansi w’obutendesi bwa Felix Ssekabuuza, Kirya Ibrahim ne Davis Nnono Ssozi.
Katikkiro asoose kukwasa abazannyi ba Ssingo emidaali egya feeza, olwokukwata ekifo ekyokubiri.
Kyaggwe nayo ekwasiddwa emidaali egyekikomo olwokukwata ekifo ekyokusatu nga bano baasoose okukuba ttiimu ye ssaza Bugerere mu kyokulwanira ekifo ekyokusatu.
Aba Kyaggwe emidaali jibakwasiddwa Omumyuuka asooka owa Katikkiro, Owek Prof Twaha Kaawaase Kigongo.
Katikkiro wa Buganda, Owek Charles Peter Mayiga, mukwogerako ne bannamawulire, atenderezza omutindo omulungi ogwoleseddwa mu mpaka z’omwaka guno, n’empisa abazannyi zeboolesezza.
Minister waabavubuka n’emizanyo mu Bwakabaka, Owek Ssalongo Robert Sserwanga, yebazizza abateesiteesi, n’abazannyi b’empaka zino, zaagambye nti buli mwaka zeyongera omutindo.
Akulira Airtel Uganda, Ali Balunywa, abavujjirizi abakulu abeempaka zaamasaza ga Buganda, agambye nti ebyoleseddwa mu mpaka zino biwa esuubi.
Abatendesi ba ttiimu z’amasaza z’ombiriri okubadde Bassy Ssemuyaba ne Felix Ssekabuuza, bakiriziganyizza neebivudde mu mpaka nebawera okwongera okutereeza mu kiseera ekiddako.
Omuduumizi wa ttiimu ye Ssaza Ssingo, Kayongo Shaban agambye nti wadde bakubiddwa bafubye okuwa abawagizi baabwe essanyu, nebeewera okudda omwaka ogujja 2026 naamanyi.
Kalema Jimmy omusambi wa Buweekula yaalondeddwa ng’omusambi asinze omutindo omulungi mu mpaka z’omwaka guno era yaasinze okuteeba ggoolo ennyingi zibadde goolo 7.
Kalema abuulidde CBS nti empaka zaamasaza azisiibudde, oluvannyuma lw’okwegatta.ku ttiimu ya Uganda premier League eya Kitara FC.
Olukiiko olwategese empaka zaamasaza goomwaka guno, lulonze omukwasi wa ggoolo ya Ssingo, Byaruhanga Joel ng’omukwasi wa ggoolo asinze omwaka guno
Ttiimu ya Ssese ye tiimu esinze okwerwanako okwesitula mu mpaka z’omwaka gun.
Tiimu y’Essaza Kkooki ye ttimu esinze empisa.
Omumyuuka w’omwami w’essaza Kyaggwe, Matovu Vincent, yawereddwa engule ey’omwami wa Kabaka asinze okujjumbira okulaba emipiira gy’empaka z’omwaka guno.
Omusambi Ogubeco Paliyo, owa ttiimu ya Buweekula, yalondeddwa ng’omusambi asinze banne mu mupiira ogw’akamalirizo wakati wa Ssingo ne Buweekula.#
