Ttiimu y’essaza Bulemeezi ewangudde omupiira gwayo ogusooka mu mpaka za Masaza ga Buganda ez’omupiira ogw’ebigere bwerumbye Busiro omwayo mu kisaawe e Nabbingo n’egikubirayo goolo 1-0.
Mu mipiira 5 egiggaddewo oluzannya olusooka olw’ebibinja, BulemeeI ekuηaanyizaamu obubonero 4 bwokka.
Mu kibinja kye kimu Masengere, Gomba egudde maliri ne Kyaggwe goolo 1-1 mu mupiira ogubaddeko n’obugombe mu kisaawe e Kabulasoke.
Mawokota nayo egudde maliri ne Ssese 0-0 mu kisaawe e Buwama.
Mu kibinja Bulange, Buddu eyongedde okulaga eryanyi bwekubye Busujju goolo 2-1 mu kisaawe e Masaka.
Buluuli nayo efunye akabonero akasoose mu mpaka zino bwegudde maliri ne Buweekula goolo 1-1 e Kakooge.
Kabula egudde maliri ne Mawogola goolo 1-1 mu kisaawe e Bakijjulula Lyantonde mu kibinja Muganzirwazza.
Ssingo ekubye Bugerere goolo 1-0 e Mityana.
Omumyuka wa Kkweeba Owek Suzan Namubiru akinoganyiza nti Ssese emazeko bulungi oluzannya luno olusooka, era sibakuzikiza ne muluzannya oluddako.
Bisakiddwa: Isah Kimbugwe
