Lunaku lwa Saturday nga 3 June,2023 abakkiriza Abakatuliki ne Anglican bakujjukira Abajulizi ba Uganda abaafiirira eddiini emikolo emikulu giri Namugongo mu Wakiso.
Abakatuliki balina Abajulizi 24 newankubadde baasooka kubeera 22 abattibwa mu Myanga!
Abajulizi Aba Anglican bali 23.
Abajulizi bano battibwa wakati wa 31 January 1885 ne 27 January 1887.
Buli omu yattibwanga mu ngeri yiye eyeesisiwaza n’okutiisa abalala.
Wabula wadde baasooka kulabulwa beesonyiwe eddiini y’abazungu okusinziira ku ngeri gyebaali beyisaamu, baagaana nga bakkirizza nti ddala mu yo (eddiini) mwemwali ekitangaala.
Kino kyanyiiza bakama babwe abaali babatwala, era abaali basooka okulaba ekitangaala.
Ssekabaka Muteesa I yeyawandiikira Nnaabakyala wa Bungereza aweereze abantu basobole okusomesa ababe ebintu ebyenjawulo, era omwajjira n’eddiini.
Eklezia Katulika yalangiriara abajulizi 22 mu lubu lw’abeesiimi mu 1920 ate nebalangirirwa mu lubu lw’Abatuukirivu mu 1964.
Okuva ku olwo n’okutuusa leero, Abajulizi ba Uganda kyafuukira ddala ensonga mu nsi yonna mu nzikiriza ezisuuta Kristu.
Olunaku olwa nga 03 June, lwe lumu ku nnaku enkulu eziragiddwa mu Eklezia Katulika mu nsi yonna.
Abajulizi ba Uganda baaleetera Uganda ettutumu era emanyiddwa wonna.
Enkuyanja y’abantu beekuluumulula okuva mu bitundu by’eggwanga eby’enjawulo n’ebweru okujja okujjukira Abajulizi n’okwegayirira nga bayita mu bbo (Abajulizi) okufuna eby’amagero.
Abakkiriza bangi balina obujulizi ku by’amagero byebafunye olw’okusaba nga bayita mu Bajulizi ba Uganda abatuukirivu.
Ku mulundi guno ku luuyi olw’Abakatuliki e Bulooli Namugongo, ab’essaza ly’e Jjinja babaakulembeddemu enteekateeka z’emikolo gyonna, ate ku Kijjukizo ky’Abajulizi eky’Aba Anglican e Nnakiyanja Nnamugongo, Obulabirizi bwonna obw’ibuvanjuba nga bukulembeddwamu Obw’e Bukedi bebaakulembeddemu enteekateeka z’emikolo gyonna.
Lindirira ebirala ku Bajulizi ba Uganda.
Bya: Kamulegeya Achileo Kiwanuka.