Omusajja omu ateeberezebwa okubeera owa ADF akwatiddwa mu bitundu bye Mpondwe mu district ye Kasese nga kigambibwa nti yoomu ku batirimbudde abayizi n’abatuuze abasoba mu 40 ku ssomero lya Mpondwe Lhubiriha SS.
Abatuuze bagamba nti omusajja akwatiddwa asangiddwa n’engoye ezivulubanye omusaayi, ng’ayinza okuba yoomu ku batemyetemye abayizi n’okubookera mu bisulo nga bebase mu kiro.
ASP Tumusiime Nelson omwogezi wa Police mu bendo bendo lya Rwenzori East etwala Kaseese ategezeza nti nga bakolagana n’egye lya UPDF mu muyigo gwebakoze ku batujju ba ADF, n’abatuuze waliwo abamu ku bebakutte, kyokka agambye nti alipoota enzijjuvu egenda kuva mu woffiisi y’omwogezi wa Police mu ggwanga Fred Enanga.
Omuduumizi w’amagye g’eggwanga Gen Wilson Mbadd n’omuduumizi w’amagye go ku Ttaka Lt Gen Kayanja Muhanga, badduse bukubirire okugenda mu district ye Kasese okwetegereza embeera nga bweyimiridde.
Bakusalawo ekiddako wamu n’ekibinja ky’amagye ekyo munsozi ekya Mountains Brigade mu kuyigga abatujju ba ADF abakoze obulumbaganyi ku ssomero.
Brig Felix Kulaigye omwogezi w’eggye ly’eggwanga erya UPDF ategezezza nti olutalo olw’okununula abayizi 6 abawambiddwa ddwo lutandikiddewo.
Brig Felix Kulaigye era ategezezza nti President Yoweri Kaguta Museven era omuduumizi w’amagye ow’okuntikko Gen Yoweri Kaguta Museveni alagidde Ministry y’eby’enjigiriza okugenda okukwatagana n’abaddukanya essomero lino eryakoleddwako obulumbaganyi buno.
Essomero lino liri mu kitundu kye Mpondwe ku nsalo ya Uganda ne Democratic Republic of Congo.
Bisakiddwa: Mukasa Dodovico
