Ababadde bakola omulimu gw’okuvuba n’okusuubula Mukene abegattira mu kibiina kyabwe ki Sliver Fisher and Processer Association okuva ku myalo egyenjawulo egisangibwa mu district ye Mukono, Kalangala, Buvuma ne Wakiso bagala omukulembeze w’eggwanga Yoweri Kaguta ayingire mu nsonga zino baddemu okukkirizibwa okuvuba mukene.
Ebitundu bino byawerebwa okuvubamu mukene nga government egamba nti baali bavubiramu obuwuuta obuto.
Abavubi ba mukene bagamba nti bakunukiriza okuweza omwaka okuva lwebaawerebwa okuvuba mukene, ekikosezza ennyo ebyenfuna yabwe.
Babadde mu lukungaana lwabwe olutudde ku Festino City e Mukono nebategeeza nti ensonga eno engeri gyeyakwatibwamu teyali yabwenkanya eri abavubi bonna abakunukkiriza mu mitwalo omwenda abayimiriddewo olw’omulimu guno.
Bagamba nti abantu abatono abatagoberera mateeka government beyanditaddeko amaanyi, mu kifo ky’okukosa abantu abangi.
Ayogerera ekibiina ki Sliver Fisher and Processer Association Wasajja David agambye nti basazeewo okuwandiikira omukulembeze w’eggwanga abeeko kyasalawo ku nsonga eno, oluvannyuma lw’okuwandiikira parliament wabula nga n’okutuusa kati tewali kuddibwamu kwonna kwebaafunye.
Mu kiseeera kino Mukene yafuuka wa kkekwa erw’ebitundu ebimu okuba nga tebikyakkirizibwa kumuvuba.
Bino webigidde ng’omukulembeze w’eggwanga yakatuula mu nsonga z’abasuubuzi mu ggwanga, ababadde bemulugunya ku nkola y’okukozesa alisiiti eziyise mu byuma eya EFRIS ( Electronic Fiscal, Receipting and Invoicing Solution).
Bisakiddwa: Majorine Kiita Mpanga
