Katikkiro wa Buganda Charles Peter Mayiga alaze Obwetaavu bw’okuzimba Amatendekero g’abakugu mu by’Obulamu mu ggwanga omuli ebikozesebwa ebyomulembe, kiyambeko mu kufulumya abakugu abatuukana n’omulembe.
Katikkiro abadde asisinkanye abakulira ebbanguliro ly’Abasawo erya Victoria School of Nursing and Midwifery abavudde e Lira, abaagala okutta Omukago n’Obwakabaka okubangula Abaana ba Buganda mu busawo, ng’ensisinkano eno ebadde mu Bulange e Mengo.
Katikkiro agambye nti nga Uganda bwerowooza ku kugaziya Amasomero g’Abasawo, okubangulwa kwabwe kulina obutabeera kwa kiboggwe, n’Okubamanyisa nti emirimu gyebakola giba gya kuyitibwa, sso ssi kutuusa mukolo.
Katikkiro akinogaanyizza nti enkolagana wakati w’Obwakabaka n’Ebbanguliro lya Victoria School of Nursing and Midwifery Lira yakutukibwako ,ssinga ebyetaagisa byonna binakolebwako.
Dr. Isaac Orech nga yaakulira ettendekero ly’Abasawo erya Victoria School of Nursing and Midwifery Lira, ategeezezza nti mu Nkolagana eno Obwakabaka bwa Buganda bwakusunsula abayizi 10 buli mwaka okumala emyaka etaano, nga bano bakutendekebwa okufuuka abasawo.
Dr Orech atenderezza Obwakabaka bwa Buganda olw’Okubeera ekyokulabirako eri abantu baabwo, nga bubajjanjabira mu nsiisira z’Ebyobulamu ezenjawulo n’emirimu emirala egikolebwa.
Dr Orech agambye nti mu bbanga lyebaakamala mu kisaawe ky’Okubangula Abasawo, bangi ku babanguddwa batwaliddwa emitala w’Amayanja okugenda okukolera eyo,ekyongedde okuwa ettendekero lya Victoria School of Nursing and Midwifery Lira amaanyi.#
Bisakiddwa: Kato Denis
