Omuvubuka Ibrahim Musana myaka 27 amanyiddwa nga Pressure 24 Seven abadde akozesa omutimbagano naddala ogwa Tiktok okuvvoola Ssaabasajja Kabaka, asomeddwa emisango 8 gyeyegaanye n’asindikibwa ku alimanda okutuusa nga 07 March ,2024.
Pressure asimbiddwa mu maaso g’omulamuzi wa kooti ya Buganda Road Ronald Kayizzi, n’amusomera emisango omuli okusiga obukyayi,okukozesa obubi computer n’emirala.
Oludda oluwaabi nga lukulembeddwamu Joan Keko lutegeezezza omulamuzi nti wakati wa August 2023 ne February 2024, Pressure ng’ayita ku mukutu gwe ogwa TikTock abadde avvoola Ssaabasajja Kabaka Ronald Muwenda Mutebi 11 , President Museveni , Sipiika wa parliament Annet Anita Among, minister omubeezi ow’ebyempuliziganya Joyce Naboosa Ssebugwawo n’abalala.
Musana agambye nti yali tamanyi nti ebikolwa bye bivvoola Nnyinimu Ssaabasajja Kabaka.
Agambye mbu emizimu gya ba ssekabaka gimusumbuwa okuteereza amasiro ,kyokka awandiikidde mengo ebbaluwa teziddamu.
Agambye alina obuzibu ku bwongo era yali yatwalibwako n’e Butabika mu ddwaliro ly’abalwadde b’emitwe.
Annyonyodde mbu atawaanyizibwa empewo za Buganda omuli za ba Ssekabaka ba Buganda nti abamulinnya ku mutwe nga bamulagira okumaliriza amasiro gabwe.
Yegayiridde kooti emusonyiwe n’asuubiza obutaddamu kuvvoola bantu, era nti wakusiimuulayo obutambi bwonna obubavvoola okuva ku TikTok.
Omulamuzi amusindise ku alimanda okutuusa nga 07 March,2024 lwanadda mu kooti ng’aleese n’abantu abamweyimirira abalimu omuzinzi n’ebisaanyizo.
Bisakiddwa Betty Zziwa