Ministry y’ebyobulamu erangiridde nti eyongedde amaanyi mu kaweefube w’okuzimba ebifo ewaterekebwa amabeere agaweebwa abaana abazaalibwa nga tebannatuuka n’abafiirwako ba nnyabwe nga bakazaalibwa.
Ebifo ewaterekebwa amabeere g’abaana ebiyitibwa Human Milk Banks mu Uganda mukyalimu bisatu byokka okuli St. Francis Hospital Nsambya, Nakasero Hospital ne Mbale Regional Referral Hospital.
Ministry ye by’obulamu eri ku kaweefube okutandikawo ebifo ebirala mu malwaliro gonna amanene nga batandikira Mulago ne Kawempe.
Kaweefube ono atuukidde mu kaseera nga Uganda yeegasse ku nsi yonna okukuza wiiki y’okwefumiitiriza ku miganyulo egiri mu kuyonsa abaana.
Akulira okuzaalisa n’okujjanjaba abaana mu ministry y’e by’obulamu Dr. Richard Mugabi agambye nti ebifo ebyo Bigenda kukendeeza omuwendo gw’abaana abakonziba.
Mu ngeri yeemu government etongozza ennambika etuumiddwa Nutrient Profile Model, egendereddwamu okuluηηamya abakozi b’eby’okulya, ku bipimo by’ebirungo byebalina okubiteekamu.
Ssenkulu w’ekibiina Ki Center For Food and adequate Living Rights Kabanda David agambye nti ennambika eyo egenda kuyamba okukendeeza endwadde ezibadde ziruma banna Uganda nga ziva ku kulya ebintu ebirimu ebirungo ebiyitiridde.
Bisakiddwa: Ssekajjiijja Augustus
