Nnaalinnya Lubuga Dr.Agnes Nnabaloga atemye evvuunike ly’Okuzimba ekizimbe galikwoleka ku ttendekero lya Ssaabasajja Kabaka Muteesa the first Royal University,ekigenda okuwemmenta Obuwumbi bwa shs 23.
Ekizimbe kino kyakubeerako emyaliriro 6, nga kisuubirwa okutuuza abayizi abakunukkiriza 5000.
Evvuunike eritemeddwa y’emu ku nteekateekay’ebikujjuko byokujjukira amatikkira ga Ssaabasajja Kabaka Ronald Muwenda Mutebi II okw’omulundi ogwa 33.
Emikolo gy’amatikkira gigenda kubeera ku kkanisa ya Watoto ministries e Bweyogerere nga 31 July, 2026.
Minister w’Ebyenjigiriza n’Ebyobulamu Owek Chotilda Nakate Kikomeko agambye nti ekizimbe kino kyaayisibwa mu Mbalirira y’Obwakabaka 2026/2027 era kigenda kuzimbibwa mu mitendera Ebiri.
Nnaalinnya Dr. Agnes Nabaloga asoose kusiimba muti gw’Ekibala ky’Omuyembe ogw’ekijjukizo.
Ku mukolo guno kubaddeko okwogera okwenjawulo okwesigamiziddwa ku kujjukira amatikkira , okukulemberwaamu Omwaami w’Essaza Bulemeezi Kangaawo Omulangira Dr Ronald Mulondo.
Omukolo guno gwetabiddwaako Vice Chancellor wa Muteesa the first Royal University Prof Vincent kakembo, Omumyuukawe Prof Satanirus Kasozi Mulindwa, Eyaliko Omubaka wa Makindye ssaabagabo mu Lukiiko lw’eggwanga Olukulu Emmanuel Ssempala Kigozi Ssajjalyabeene nga memba w’Olukiiko olufuga University ,nabakungu abalala bangi.
Bisakiddwa: Kato Denis
