Abakulira omukago ogutaba ebibiina ebirina ababaka mu parliament ya Uganda ogwa IPOD bawandiikidde ekibiina ki National Unity Platform NUP, nebakirambika ku nsonga ekibiina kino zekirina okutuukiriza mu bwangu olwo kiyingizibwe mu butongole mu mukago guno.
Bassaabawandiisi b’ebibiina ebirina obwa memba mu IPOD okuli DP, FDC, NRM ne UPC baatuula mu nsisinkano nebakkiriza ebibiina okuli Alliance for National Transformation ne National Unity Platform bikkirizibwe okuyingizibwa mu mukago
Wabula NUP yali tenatuukiriza misoso gyonna egyetaagisa okwegatta ku IPOD
Mu bbaluwa ewandiikiddwa eri ekibiina ki NUP okuva eri seenkuku w’omukago gwa IPOd, Dr Lawrence Sserwambala, NUP esabiddwa okuwandiika mu butongole eri omukago guno nga esaba mu butongole okwegatta ku IPOd
Dr Lawrence Sserwambala agambye nti ebbaluwa NUP gyeyawandiika omwaka oguwedde 2025 teyasaba kwegatta ku mukago, wabula yali eraga bulazi nti ekibiina kyeteegefu okwegatta ku IPOD.
Dr Sserwambala awabudde NUP okuwandiika ebbaluwa entongole nga esaba omukago gwa IPOD okugikkiriza okugwegattako.
NUP eragiddwa okuwandiika ebbaluwa eyo mu bwangu , bweba yakuyingizibwa mu IPOD kikolebwe mu lutuula lwabakulembeze b’ebibiina bya IPOD olusuubirwa okutuula nga omwezi guno ogwa June 2026.
Ekitebe kya IPOD era kisabye ekibiina ki NUP kibuulire omukulembeze w’ekibiina kino Robert Kyagulanyi Ssentamu,akomewo mu ggwanga kimusobozese okuteeka omukono ku ndagaano ya NUP okwegatta ku IPOD.
Dr Sserwambala mu bbaluwa eno agambye nti ekibiina kyonna okwegatta ku IPOD, omukulembeze w’ekibiina yekka yalina okuteeka omukono ku ndagaano y’okwegata ku IPOD, ng’ali wamu ne Ssaabawandiisi wa IPOD.
Mu kiseera kino, omukulembeze wa NUP ali mu ggwanga lya America gyeyewohomako oluvanyuma lw’okulonda kwa January 2026.
Kigambibwa nti NUP yali eyagala omumyuuka wa President wa NUP Lina zedriga nti yaaba akiikirira Robert Kyagulanyi Ssentamu okussa omukono ku ndagaano y’okwegatta ku IPOD, wabula ng’endagaano ya IPOD eyogera ku president wa kibiina yekka.
Kinnajjukirwa nti omwaka oguwedde 2025, NUP yakuba enkyuukira newandiikira IPOd ng’egitegeeza nti nneetegefu okwegatta ku IPOD oluvanyuma lwa parliament okukola ennongosereza mu tteeka erifuga ebibiina byobufuzi.
Ennoongosereza zino zaalambika nti ekibiina kyokka ekirina endagaano ne IPOD kyekyokka akakiiko k’ebyokulonda kekirina okuwa ensimbi, government zeewa ebibiina ebirina ababaka mu parliament.
Okuva etteeka lino lweryakyusibwa, NUP yammibwa ensimbi obuwumbi 5 n’obukadde 700 bweyali efuna buli mwaka.
Ensisinkano y’abakulembeze b’ebibiina ebirina obwa memba mu IPOD okuli NRM, DP ,UPC ne FDC emanyiddwanga IPOd summit yakutuula ku nkomerero y’omwezi guno ogwa June, ng’omwaka gw’ebyensimbi guno 2025/2026 tegunagwako,okuyingiza ebibiina ebiggya mu mukago guno.#
