Minister omubeezi ow’ebyemizannyo Peter Ogwanga, akakasiza nti omulimu ogw’okuzimba ekisaawe kya Akii Bua Olympic Stadium e Lira gutambula kinnawadda, era gusuubirwa okumalirizibwa mu kiseera kyenyini ekyagerekebwa.
Minister Ogwanga bino abikakasizza oluvanyuma lw’okulambula ekisaawe kino, era akakasiza nti omulimu guno gutuuse ku bitundu 45%.
Minister Ogwanga agambye ebitundu 45% kabonero akenkukunala nti abali ku mulimu ogw’okuzimba ekisaawe kino aba SAMCO National Construction Company, baguddusiza okusingako ne bwebaali basuubidde, era talina kubuusabuusa nti mu mwezi ogwe 10 omwaka guno gujja kuba guwedde.
Bino bigenze okukakasibwa nga ne CAF yakamala okufulumya alipoota eraga obweralikirivu nti omulimu guno guyinza obutagweera mubudde okutegeka empaka za Africa Cup of Nations ez’omwaka ogujja 2027.
Empaka za AFCON 2027 zitegekeddwa Uganda,Kenya ne Tanzania.#
Bisakiddwa: Isah Kimbugwe
