Katikkiro wa Buganda Charles Peter Mayiga awadde bannabyabufuzi amagezi okukomya okusuubiza bannansi ensi neggulu ate nebatasobola kutuukiriza,naabasaba essira balizze ku birowoozo ebitwaala eggwanga mu maaso.
Abadde asisinkanye abakulembeze ba NRM abegwaanyiza ebifo ebyenjawulo mu Buganda, ensisinkano eno ebadde mu Bulange e Mengo.
Katikkiro ategeezezza nti ebisuubizo bingi ebisuubiziddwa bannababufuzi eri bannansi bigaanye okuvaamu ebibala.
Katikkiro mungeri yeemu asabye abakiise mu parliament okufuba okusakira abantu bebakiikirira, ate babaweereze mu bwesimbu.
Amyuka Ssentebe wa NRM mu Buganda era nga ye minister wa Microfinance n’obwegassi Hajji Haruna Kyeyune Kasolo, awadde obweeyamo nti ensonga za Buganda ezibadde zikyaali mu ddiiro zigenda kukwatibwaako mu ngeri eyenjawulo.
Mu ngeri yeemu minister Kasolo yebazizza Obwakabaka olw’okukulemberamu enkulaakulana y’Abantu naddala mu kulima.
Ssentebe w’Akabondo k’Ababaka ba NRM mu Buganda Robert Migadde Ndugwa , ategeezezza nti embeera y’Ebyobufuzi etaali nungi ku ludda lwa NRN mu Kalulu k’Omwaaka 2021 yabayisa bubi nnyo, nebasalawo okugisalira amagezi.
Minister w’Ensonga za Kampala Minsa Kabanda, yeyanzizza Ssaabasajja ne gavumenti ye olw’Omukisa ogwamuweebwa naweereza mu yafeesi ezenjawulo, ate era naweereza awatali kumutiiririra.
Bakiise embuga n’Ettu lya Bukadde bwa shs 10, okuwagira emirimu gy’Obwakabaka.#
Bisakiddwa: Kato Denis
