Amasaza okuli Ssingo, Bugerere, Buweekula ne Kyaggwe, gesozze omutendera gwa semifinal mu mpaka za Masaza ga Buganda ez’omupiira ogw’ebigere ez’omwaka guno 2025 oluvanyuma lw’omutendera gwa quaterfinal okukomekerezebwa olwaleero.
Ssingo ewanduddemu Mawokota ku goolo 1-0 mu mupiira ogubaddeko n’obugombe mu kisaawe kya Ssaza Grounds e Mityana, ate nga n’omupiira ogwasooka e Buwama ttiimu zino zalemagana 0-0.
Bugerere egudde maliri ne Buluuli 1-1 e Migyera, olwo Bugerere neyitawo ku mugatte gwa goolo 3-2, oluzannya olwasooka e Ntenjeru Bugerere yakuba Buluuli goolo 2-1.
Buweekula nayo egudde maliri ne Busujju goolo 1-1 mu kisaawe kya Mubende NTC, olwo Buweekula neyitawo ku mugatte gwa goolo 2-1, kuba oluzannya olwasooka e Kakindu Buweekula yakuba Busujju goolo 1-0.
Ku mutendera gwa semifinal, Buweekula ya kwambalagana ne Kyaggwe ate nga Bugerere yakuzuzumba ne Ssingo.
Bisakiddwa: Isah Kimbugwe
