Katikkiro wa Buganda Charles Peter Mayiga abangudde abakiise b’olukiiko lwa Buganda ku bintu ebyenkizo byebalina okusaako essira okubeera abakiise abenjawulo.
Babadde mu lusirika lw’abakiise olqa buli mwaka, olubadde ku Butikkiro e Mengo, ku mulamwa ogugamba nti ‘omukiise w’Olukiiko ow’Embala’.
Katikkiro agambye nti omukiise ow’embala asuubirwa okubeera Omwesimbu, omuvumu, era atuukiriza obuvunaanyizibwa bwe.
AbakubirizA okufa ennyo ku bulamu bwabwe nga bakola dduyiro, okwekebeza endwadde, olwo bakole emirimu gya Nnyinimu Ssaabasajja Kabaka nga balamu bulungi.
Kamalabyonna mungeri eyenjawulo akubirizza abakiise mu lukiiko lwa Buganda okwagazisa Abantu ba Ssaabasajja Kabaka okwettanira okulonda abantu abawulize eri Empologoma, era abawagira enteekateeka zÓbwakabaka.
Era abasibiridde entanda ey’okunyeza obumu mu bantu naddala mu biseera bino eby’obululu, boolese ekifaananyi ekirungi ekiggyayo ekitiibwa ky’omukiise mu lukiiko, enneeyisa mu nnyambala, endabika, amaka amayonjo n’ebirala.
Abasabye baagazise abantu enteekateeka z’obwakabaka, basomese abaana, babasigemu empisa z’obuntubulamu, bakubirize abantu ku nsonga z’obutondebwensi ne Bulungibwansi.
Omukubiriza wÓlukiiko lwa Buganda Owek Patrick Luwagga Mugumbule ategeezezza nti Olukiiko lwa Buganda lwatandise okutalaaga Amasaza mu ngeri eyenjawulo, okwekeneenya entekateeka zÓbwakabaka bwezissibwa mu nkola , ekitadde ettoffaali eddene ku nzirukanya yÉmirimu mu Bwakabaka.
Ssentebe wÓlukiiko lwÁbaami bÁmasaza ga Buganda Kangaawo Omulangira Ronald Mulondo, agambye nti olusirika luno luwadde Abaami omukisa okumanya Buganda weeyimiridde ku nsonga ezenjawulo.
Omukugu mu kulima Emwaanyi era nga yabadde Omusomesa owenjawulo George William Kasumba Ddumba omukiise mu lukiiko lwa Buganda akiikirira Kooki , asabye abalimi baazo okukozesa tekinologiya mu bulimi bwazo, kiyambeko mu kwetangira ebigwa tebiraze, n’okufuna amakungula ageegasa.
Abamu ku bakiike b’Olukiiko omubadde Omwaami wa kabaka owesaza Butambala Katambala Sulaiman Magala, Owek Damas Mulagwe ne owek Isaac Mpanga munnamateeka mu lukiiko lwa Buganda, bebazizza olw’entekateeka yÓlusirika, era nebasaba okubangula n’Okulambika Abakiise ku nsonga ezenjawulo kutegekebwe entakera.#
