Club ya Vipers egucangira mu liigi ya babinywera eya Uganda Premier League, eziza bugya endagaano y’omuwuwutanyi Abdul Karim Watambala, mu kwongera okuggumiza ttiimu eno okuvuganya obulungi season ejja eya 2025/26.
Abdul Karim Watambala endagaano ye enkadde ebadde yaweddeko omwezi oguwedde ogw’omukaaga, era club ya Simba eya Tanzania yeemu kuzibadde zimwegwanyiza.
Abdul Karim Watambala yegatta ku Vipers mu 2019 ng’ava ku ssomero lya St Mary’s Kitende, era mu 2023 yaddamu okuzza obuggya endagaano ye ebbanga eddala lya myaka 2.
Ebbanga ery’emyaka 6 gye yakamala mu club eno, abawangulidde ebikopo bya liigi 4 ne Uganda Cup bisatu.
Watambala yegasse ku bazannyi abalala abazizza obuggya endagaano zaabwe okuli captain Milton Kariisa, Patrick Mboowa ne Alfred Mudekereza.
Vipers FC era yaakagula abazannyi 2 okuli Mark Yallah munnansi wa Liberia ne Enock Ssebaggala okuva mu club ya NEC.
Bisakiddwa: Isah Kimbugwe
