Ekitongole ekivunaanyizibwa ku butonde bwensi mu ggwanga ekya NEMA kigugumbudde abakulembeze mu district ezenjawulo olw’obutatuukiriza buvunanyizibwa bwabwe mu kutaasa entobazzi nebibira, era babalumiriza okubanga bebavuddeko abantu enkumu okusenga mu ntobazzi.
Ab’ekitongole kya NEMA ekikulembeddwamu Francis Ogwal, bategeezezza nti district erina obuyinza bunene nnyo okulemesa abantu okusenga mu bifo ebityoboola obutonde bw’ensi, mu kifo kya buli kimu okukitunuuliza NEMA.
Agambye nti obukulembeze bw’ebitundu bwe buyisa ppulaani z’abantu nga bagenda okuzimba mu kifo kyonna, omuli naabo abalagiddwa okusenguka mu ntobazzi.
Babadde ku Ivory Hotel e Nansana mubkusomesa abakulembeze abenjawulo okubadde basentebe b’amagombolola, bakansala ku district, n’abakozi mu district naddala abavunanyizibwa ku butonde bwensi.
Wabula akulira abakozi n’ebyekikugu-CAO, Alfred Malinga, akukkulumidde NEMA olwokubateekako olukongoolo, nti ngate balina abantu bebazze bagaana okuzimba mu ntobazzi ate nebabasanga nga balina certificate okuva mu NEMA.
Omubaka wa parliament omukyala owa district ye Wakiso , Betty Ethel Naluyima, atabukidde aba NEMA okulowooza nti obuyinza bwonna ku butonde bwensi bebabulina, era nebaggyawo obuyinza bwa zzi districts, embeera bwebatabukidde ate olukongoolo nebalyooka baluzza ku bakulrmbeze b’ebitundu.
Omumyuka wa Ssentebe wa district, Betinah Nantege, asabye NEMA ebyokusonga ennwe babikomye wabula bakwatire wamu mu kusomesa abantu ku by’amateeka agakwata kukutaasa entobazzi n’ebibira .
Bisakiddwa: Tonny Ngabo
