Obululu bw’empaka z’omupiira ogw’ebigere eza Uganda Cup ez’omulundi ogwa 49 ez’omutendera gwa ttiimu 64, bukwatidwa olwaleero ku kitebe kya FUFA e Mengo.
Emipiira ku mutendera guno gigenda kuzanyibwa okuva nga 27 omwezi guno okutuuka nga 3 omwezi ogujja ogwa February.
Ttiimu zonna eza Uganda Premier League ne FUFA Big League zigenda kuzannya emipiira gyazo ku mutendera guno ku gugenyi, era ttiimu zonna zigenda kuba zirwana okwesogga omutendera gwa ttiimu 32.
Bannantameggwa b’empaka ezasembayo aba BUL akalulu kabasudde ku club ya Sparks eye Mukono.
Vipers gye bakubira ku final mu mpaka eziwedde akalulu kagisudde ku Bujumbula United eye Hoima.
KCCA egenda kuzannya ne KJT, Villa Jogo Salongo egenda kuzannya ne Kireka United, Express mukwano gwabangi egenda kuzannya ne Kajjansi United.
Florence Nakiwala Kiyingi omumyuka wa president wa FUFA ow’okusatu, bwabadde akulembeddemu omukolo gw’okukwata obululu buno, yebazizza bannamukago era nakakasa nti ku mulundi guno omuwanguzi agenda kufuna ensimbi obukadde 50.
Ttiiimu enakwata ekifo eky’okubiri egenda kufuna obukadde 25.
Ttiimu ezinatuuka ku semifinal zakufuna obukadde 12 n’ekitundu, eza quaterfinal obukadde 6, round of 16 obukadde 3, round of 32 obukadde 2, nga ewamu obukadde 180 zezigenda okugabwa.
KCCA ne Express bebakasinga okuwangula empaka zino emirundi 10, Villa Jogo emirundi 9, URA emirundi 3 nabalala.
Bisakiddwa: Issah Kimbugwe