Bya Kato Denis
Abayeekera ba M23 bongedde okusiisira mu bitundu ebiriraanye ensalo ye Bunagana ku ludda lwa DRC, ebikumi n’ebikumi by’ababundabunda byongedde okwesogga Uganda.
Waliwo abamu ababadde basazeewo okuddayo okwaboobwe,bakomyewo misinde.
Kigambibwa nti waliwo abantu ba bulijjo abattiddwa mu kulwanagana wakati w’amagye ga DRC aga FARDC n’abayeekera ba M23, wabula omuwendo gw’attiddwa tegunamanyika.
Waliwo abaana abasangiddwa nga basigadde ttayo,kigambibwa okuba nga bazadde babwe bebamu ku battiddwa mu kulwanagana kuno.
Omu ku baana bano embeera gyalimu eyungula ezziga,era omu ku bbo atwaliddwa mu ddwaliro lye Gitowa mu Bunagana town council okufuna obujanjabi.
Meeya wa Bunagana municipality Ismail Ndayambaje ategeezezza nti tebagenda kuddamu kukkiriza munoonyi wabubudamu yenna kusala nsalo kudda Congo, okugyako nga gavumenti yaayo eyisizza obubaka obukakasa nti ebyokwerinda binyweevu, olwo ababundabunda abaagala okudda okwa boobwe bakkirizibwe baddeyo.
Ebyobusuubuzi tebinnaddamu kutereera nga bwegubeera bulijjo, ababundabunda bakwatiridde ku mbalaza z’amaduuka, n’abasuubuzi mu kitundu ekyo nabo batya okufiirizibwa emmaali yaabwe.
Ku ssomero lya Bunagana primary school ewasinze okugumba ababundabunda abangi, abayizi tebanaddamu kusoma okuva ku ntandikwa ya wiiki eno abayeekera lwebaalumba.
Ababundabunda bano basuubirwa okutwalibwa mu nkambi ye Nyakabande,singa embeera egaana okutereera.
Omuwendo gw’ababundabunda ogweyongera buli kadde gutaddewo okutya nti ebirwadde ebikambwe omuli Chorella n’endwadde endala eziva ku buligo zandyeyongera,olw’embeera gyebalimu
Okuva mu 1998 abayeekera ba M23 bazze batanula ennumba ezenjawulo mu DRC,abantu ba bulijjo bikumi na bikumi nebasigala nga babundabunda, nga kwotadde n’ebibinja by’abayeekera ebirala ebyekweka mu bibira bwaguuga n’ensozi ebiri mu ggwanga eryo.
