Bannaddiini abakulira enzikiriza z’abagoberezi ba Kristu mu Uganda mu kibiina kyabwe ekya Uganda Joint Christian Council baagala banna Uganda bannyikize enkola y’okuleeta emirembe n’okuwuliziganyanga bulijjo mu butakkaanya mu ddiini n’ensonga z’ebyobufuzi.
Mu bubaka bwabwe obw’amazuukira ga Kristu obw’omwaka guno, basinzidde ku kisaawe ky’essomero lya Old Kampala awabadde entikko y’okutambuza Ekkubo ly’Omusaala, nebasaba banna Uganda okutambulira ku kiragiro kya Krsitu eky’Okusaba, okusonyiwagana n’okutabagana ne bantu bannaabwe.
Obubaka buno busomeddwa bannaddiini okuli Ssentebe w’ekibiina kino era omwepisikoopi w’e Kiyinda Mityana, Rt. Rev Dr. Joseph Anthony Zziwa, Ssaabalabirizi w’ekkanisa ya Uganda The Most Rev Dr. Samuel Stephen Kazimba Mugalu ne Ssaabasumba w’Eklesia y’Abasoddookisi mu Uganda His Eminence Joronymous Muzeeyi.
Basabye government ya Uganda okulondoola enkozesa y’emmundu mu ggwanga zeboogeddeko nti nnyingi ziri mu mikono emikyamu, zikozesebwa okutirimbula banna Uganda, nebasaba ekitongole ekinoonyereza ku buzzi bw’emisango ne Police okukola obutaweera okuzuula abatemula banna Uganda era bavunaanibwe ng’amateeka bwegalagira.
Bategeezezza nti emmundu mu ngeri yeemu nnyingi zikosesebwa okuwamba n’okusengula abantu ku ttaka olwo bannansi bangi nebasigala nga mmomboze.
Basabye wabeewo obwenkanya ku nsonga y’ettaka ng’omugagga n’omwavu bakolwako kyenkanyi. Bategeezezza nti emirundi mingi waliwo abeeyita abagagga abakozesa emmundu okuwamba ettaka ly’abaavu ate nga era tebasobola kwekubira nduulu mu mbuga z’amateeka yadde okubeera n’ensimbi okufuna bannamateeka okubalwanirira.
Boogedde ku nsonga y’okukuuma obutonde bw’ensi nebasaba government enyweze amateeka g’okutaasa n’okukuuma emigga, entobazzi, ebibira n’obutonde bw’ensi obw’engeri zonna.
Bavumiridde omuze ogulemedde mu banna Uganda ogw’okumansamansa ebicupacupa n’obuveera byebagambye nti nabyo kanaaluzaala ku buttoned bw’ensi obutoboddwa.
Mu ngeri yeemu bannaddiini bano bavumiridde obulyake n’obunenuzi obukudde ejjembe mu ggwanga kyebagambye nti buno bunafu bwa government ya NRM, ntu kubanga bweyali ejja mu buyinza, okulwanyisa enguzi yeemu ku nsonga ez’enkizo ezaali ku mwanjo wabula embeera eri mu ggwanga ku buli bw’enguzi eraga nti ate abakulu mu government abalyake babasiiga busiizi kazigo.
Bagambye nti obulyake n’obuli bw’enguzi buviiriddeko banna Uganda obutafuna buweereza nga bwebateekeddwa kubanga ensimbi ziggwera mu bantu ab’olubatu olwo banna Uganda abalala nebasigala nga beemagaza.
Mu Uganda buli mwaka ku Lwokutaano Olutukuvu , abakkiriza mu Kristu okuli Abakatuliki, Abaprotestante ne Abasoddookisi batambuza Ekkulu ly’Omusaalaba eryawamu, ng’ebibinja eby’enjawulo biva ku lutikko ez’enzinjawulo olwo nebafuna ensisinkano eyaawumu ku kisaawe ky’essomero lya Old Kampala SS.
Ekkubo ly’omusaalaba lyetabyemu bannaddiini okuli abasseserdooti, abasisita, abaawule, abasumba n’abantu ba Katonda abalala bangi.
Bisakiddwa: Kamulegeya Achileo Kiwanuka.
