Abatuuze mu Kabuga ke Maddu mu district ye Gomba bawanjagidde abakulira ekitongole ky’ebyenguudo mu ggwanga eky UNRA, kibayambe kizibe ekinnya ekiri ku nkulungo y’oluguudo lwa kolaasi oluva e Mpigi okutuuka e Sembabule oluyita mu kabuga ako.
Waliwo mmotoka 2 ekika Kya Loole ezikubyeko eby’amaguzi eziguddewo, ziremereddwa okuweta enkulungo eyo olw’ekinnya ekiwanvu ekiriwo.
Abatuuze mu town ye Maddu nga bakulembeddwamu Yoga Robert ne Sarah Kiberu nga y’emwami wa Kabaka ow’eggombolola ya Ssabaddu Maddu era nga mutuuze mu town ye Maddu, bategeezezza nti ab’ekitongole ki UNRA buli lwebagenda mu kitundu ekyo, bakanya kuyiwa musenyu n’oluyinja mu kinnya ekyo, nti kyokka ekinnya kyeyongera kugaziwa olwa Loole enzito eziyita ku luguudo olwo.
Ssabaddu Sarah Kiberu agambye nti Bali mubweraliikirivu nti emmotoka ezo zoolekedde okugwira Abasuubuzi abatundira ebyamaguzi ebbali w’oluguudo, nasaba UNRA okuziba ekinnya ekyo ku mutindo ogusaanidde.
Mu ngeri yeemu bagamba nti okuva oluguudo olwo oluva e Mpigi- Butambala- Gomba – Ssembabule- Villa Maria, bwerwatandika okuyitako ebimmotoka ebizito emyezi 4 egiyise, lutandise okuwomoggoka nga byetaaga okuziba amangu nga tebinagaziwa nnyo.
Oluguudo olwo zaatandika okulukozesa oluvannyuma lw’olutindo lw’omugga Katonga okubbomoka ku nkomerero y’omwezi gwa May 2023.
Bisakiddwa: Sserugo Patrick