Ministry y’ebyenjigiriza n’emizannyo etongozza olukiiko olw’okuntikko olw’ekitongole ekivunanyizibwa ku bibuuzo ebyakamalirizo mu ggwanga ekya UNEB olw’omulundi ogwe 12.
Lukubiriziddwa okussa amaanyi mu kulwanyisa ekibba bigezo n’okutumbula omutindo.
Mu bubaka bwa minister weebyenjigiriza neemizanyo era mukyala w’omukulembeze w’eggwanga, Janet Kataha Museveni,asabye abalondeddwa ku lukiiko olupya okukulembeza ennyo omwoyo gw’eggwanga nokutumbula omutindo gwebyenjigiriza.
Obubaka bwa minister Kataha Museveni bumusomeddwa minister omubeezi avunanyizibwa ku matendekero agawaggulu, Owek. Dr John Chrysostom Muyingo, ku mukolo ogutegekeddwa ku Eliana Hotel e Ntinda mu Kampala.
Abasabye bongere okussa essira ku nsonga y’obwerufu mu nzirukanya y’ebibuuzo kuba bisalawo nnyo ebiseera by’abayizi ebyomumaaso, okwewala enguzi n’obutava ku mulamwa.
Prof Celestino Obua, nate yaalondeddwa ku bwa ssentebe bwa board ekisanja ekirala, era azeemu okuwera nti baakukola obuteebalira okutumbula obuweereza bwa UNEB.
Akulira UNEB, Daniel Odong, ayiseeyise mwebyo ebituukiddwako ekitongole kino omubadde okusobozesa abazadde n’amasomero okufunanga alizaati zebiva mu bibuuzo mu nkola endigito naddala nga bayita ku mutimbagano, obutafananako neemyaka ejiyise amasomero lwegeeyiwanga ku kitebe kyekitongole.
Agaseeko nti basobodde okwongera okuziba emiwaatwa gyonna, abakuluppya mwebaayitanga okubba ebigezo, okulwanyisa obulyake wadde waliwo ebikyalumiramu.
Abalala abalondeddwa ku lukiiko kuliko; Zulaika Nabukeera akiikirira amasomero ga Secondary, Patrick Kaboyo, akiikirira abatandisi b’amasomero aga Primary ne Senior, Mukasa Herbert, yakiikirira amatendekero g’abasomesa aba Primary Primary Teachers’ Colleges, Atwine Geofrey, akiikirira office ya Saabowolereza wa Government, Atima Frances ne Dr. Cleophas Mugenyi bombi bakiikìira Ministry evunanyizibwa ku by’enjigiriza n’ebyemizannyo n’abalala.
Boodi etongozeddwa era nerayizibwa Munnamateeka Brian Kajubi okuva mu kampuni eya MAKKS ADVOCATES.
Bisakiddwa: Ddungu Davis
