Unit z’omusaayi ezisoba mu 100 zezigabiddwa abatuuze, mu nteekateeka ekoleddwa eddwaliro lya Ssikyomu Hospital Bulaga ku Mityana road, bweribadde lijaguza okuweza emyaka 10 bukyanga litandikibwawo.
Dr. Ddamulira Adrian omu ku baatandika eddwaliro lino, agambye nti bakolaganye bulungi n’abatuuze mu nteekateeka y’okusitula eby’obulamu mu kitundu.
Agambye nti obuweereza bwabwe babwesigamya nnyo ku buntubulamu, era nga bakulembeza eky’abantu okutuusibwako obuweereza obutuufu nga tebanakulembeza kya ssente.
Dr. Ddamulira akubirizza abantu okujjumbira okugaba omusaayi, okutaasa obulamu bw’abalala.
Ssikyomu hospital etongozza n’ekifo ekyenjawulo ekituumiddwa Gyn Plaza, ewajjanjabirwa endwadde ezikwata abakyala.
Ssikyomu Doctors’ Hospital lyatandika n’abakozi 4 mu 2025 kati basukka mu 50.
Kuluthumu Namabidde ayogedde ku lw’abakozi banne, yoomu ku bakozi abawezezza emyaka 10 nga bakolera ku ddwaliro lino.
Inoccent Eria Bbanda akiikiridde abalwadde abamaze emyaka 10 nga bajjanjabirwa ku ddwaliro lino, agambye nti mu bbanga lino alabye omutindo nga gweyongerako buli mwaka.
Mukusooka wasooseewo ekitambiro kya Missa ekiyimbiddwa Rev.Fr.Elgin Kayongo, akubirizza abantu okukolera obulungi abantu abalala, nti kubanga buli muntu yetaaga munne.
Pastor Mbabazi Robert omubaka wa president Museveni, akulira eby’okulwanyisa obwavu mu ggwanga lyonna, abuulidde abetabye ku mukolo guno empagi 3, zebalina okusaako essira okubeera n’obulamu obuli yadde yaddeko, era nti empagi zezimu zebatambuza mu ggwanga lyonna.
Empagi zino kuliko ey’omuntu okubeera Omulamu nga tatawanyizibwa ndwadde, okubeera omumanyi n’okubeera n’ensimbi mu nsawo okwetusaakp ebyetaago.
Pastor Mbabazi akubirizza abantu okwewala okutemaatema mu ttaka lyebabeera basikidde, wabula balikolereko ebintu ebibagasiza awamu, bagabane nsimbi eziva mu bintu byebakolera ku ttaka, mu kifo ky’okulitematema nebalitunda obulere.
Agambye nti abantu bangi abagabana ettaka lyebasikidde bakomekkereza balitunze nebakolamu ebintu ebitali byansibo, bakomekkereza baavuwadde okusiinga bwebaali.#
