Sipiika wa parliament ya Uganda Anitah Annet Among asekeredde government ya Bungereza eyamutaddeko envumbo y’obutaddamu kurinnya lubu lwakigere mu ggwanga eryo, agambye nti talina kimutwala mu Bungereza nti kubanga talinaayo wadde eky’obugagga kyonna kyeyali ataddeyo, wadde okuggulawo account mu bank zaayo.
Mu kiwandiiko ekyafulumiziddwa amyuka Ssaabawandiisi w’ensonga ez’ebweru wa Bungereza Andrew Mitchel, kyalazze nga abakungu ba government basatu okuli Sipiika wa parliament Anitah Among nabaali ba minister b’ensonga ze Karamoja Mary Gorret Kitutu ne Agnes Nandutu, bonna ssibakuddamu kuKkirizibwa kulinnya kigere ku ttaka lya Bungereza.
Babalumiriza okwenyigira mu bulyake n’obukenuzi ku bigambibwa nti bekomya amaabati agaalina okuweebwa abawejjere be Karamoja.
Wabula sipiika wa parliament ya Uganda Speaker Among bino byonna abiyise byekwaso nga agamba ensonga ebobbya gavumenti ya bungerezza ye Palamenti ya uganda okuyisa eteeka erikugira omukwano ogwebikukujju .
Among agamba ye talina kyabugagga kyonna kiri mu Bungereza ng’era agamba mwetegefu okwetikka omusaalaba kulwabanayuganda, nti kubanga okunoonyereza kweyakoze kulaga nti envumbo eno yamuteereddwako olw’okuba parliament gy’akulembera yayisa etteeka erivunaana abantu abenyigir mu mukwano ogw’ebikukujju.
Wabula minister omubeezi ow’ensonga z’ebweru w’eggwanga John Murimba mukiwandiiko kyasomedde Parliament ategeezezza nti government ya Uganda etandise okwogeraganya ne ginaayo eya Bungereza okwongera okunyonyoka ekituufu ekyabanyiizizza, nti kubanga ensonga z’amabaati zebesibako zikyali mu kooti.
Ababaka ba parliament okuli omubaka wa Bugiri municipality Asuman Basalirwa eyayanjula etteeka lino mu parliament ya Uganda e, omubaka wa Kilak county Akol Anthony saako omubaka wa Kabula County Enos Asimwe bagambye nti tebejjusa olw’okuyisa etteeka lino, era nebewuunya government ya Bungereza okweyingiza mubitajikwatako.
Wano sipiika wa parliament Anitah Annet Among wasinzidde n’asaba ministry y’ensonga z’omunda mu ggwanga okwongera okukola alipoota eyessimba ku nsonga eno, ng’ennyonyola government ya Uganda weyimiridde ku nvumbo zino, era ejanjulire parliament.
Bisakiddwa: Nabagereka Edithie
