Ebimu ku birambikiddwa mu kulayiza president Yoweri Kaguta Museveni ku kisanja eky’omusanvu 2026/2031

Olunaku lwa Tuesday nga 12 May,2026 President Yoweri Kaguta Museveni lwagenda okulayizibwa ku kisanja eky’omulundi ogwomusanvu, ng’akulembera Uganda.

Akulembedde eggwanga lino okuva mu mwaka gwa 1986 oluvannyuma lw’okuwangula olutalo lw’ekiyeekera.

Ebisanja ebitongole eby’akalulu byatandika mu kalulu akaakubwa nga 09 May, 1996.

Ngennaku z’omwezi 17 January,2026 Yoweri Kaguta Museveni, yaalangirirwa ku buwanguzi bw’akalulu ka 2026, n’obululu obukadde 7,944,772 by’ebitundu 71.65%.

Yaddirirwa Robert Kyagulanyi owa National Unity Platform n’obululu obukadde 2,741,238 by’ebitundu 24.72%.

Omukolo gw’okukulayiza president Museveni ku kisanja eky’okusanvu gutegekeddwa ku kisaawe ky’ameefuga e Kololo nga 12 May,2026.

Okusinziira ku ssemateeka w’eggwanga, omuntu alondeddwa okukulembera eggwanga, akuba ebirayiro bibiri; okuli eky’obweyamu eri eggwanga, okukuuma ssemateeka w’ggwanga n’okulabirira bannansi bonna.

Ssabaalamuzi w’eggwanga nga mu kiseera kino ye Flavian Nzeija, yagenda okulayiza omukulembeze w’eggwanga omulonde Yoweri Kaguta Museveni Tibuhaburwa.

Okusinziira ku nteekateeka efulumiziddwa akakiiko akateekateeka okulayizibwa kw’omukulembeze w’eggwanga, akakulemberwa omuteesiteesi omukulu mu offiisi ya president, nga ye Hajji Yunus Kakande, president Yoweri Kaguta Museveni wakutuuka e Kololo ku saawa 4 n’ekitundu ezokumakya,olwo omukolo gw’okumulayiza gutandike.

Ennambika eno eraga nti ssentebbe w’akakiiko kebyokulonda wakwanjulira Ssaabaalamuzi w’eggwanga ebyava mu kulonda n’omuntu eyawangula akalulu akaakubwa nga 15 January,2026, Yoweri Kaguta Museveni Tibuhaburwa olwo Ssaabaalamuzi amuyite okukuba ebirayiro.

Oluvanyuma lw’okukuba ebirayiro ebibiri ebimufuula omukulembeze w’eggwanga Omujjuvu oluvannyuma lw’akalulu, Yoweri Museveni Kaguta wakukwasibwa ssemateeka w’eggwanga, Bendera y’eggwanga, n’endala entongole ey’obwapresident, oluyimba lw’eggwanga, n’obubonero bw’eggwanga obulala ( Seal and Court of Arms).

Oluvanyuma omukulembeze w’eggwanga okulayira, abakulembeze b’ebitongole ebikuuma eddembe bakumukubira saluti okulaga obweyamo n’obuwulize eri gyali, bwebinaggwa wakulambula ennyirira z’amagye.

Bino bwebinaggwa, wakubaawo okusabira omukulembeze w’eggwanga okunakulemberwamu Ssaabalabirizi w’ekkanisa ya Uganda Dr. Samuel Kazimba Mugalu Mboowa ne Mufti wa Uganda sheik Shaban Ramathan Mubajje.

Oluvanyuma lwokusaba, omukulembeze w’ggwanga wakwogerako eri eggwanga mu kwogerakwe okusooka oluvanyuma lw’okulayizibwa.

Ekisanja nga kikomekkerezeddwa:

Ku saawa mukaaga ezekiro kya leero nga 11 May,2026, ekisanja Ky’omukulembeze w’eggwanga aliko ekyomukaaga lwekiggwako.

Ssemateeka w’eggwanga akakata ku Ssaabaalamuzi w’eggwanga okulayiza omukulembeze omulala mu bbanga lya ssaawa 24 singa Entebbe y’omukulembeze w’eggwanga esigala nga nkalu.

Abakulembeze b’amawanga amalala bazze okubaawo ku mukolo

Abakulembeze b’mawanga agawerako bataka mu Uganda okwetaba ku mukolo gw’okulayiza Mwami Museveni ku kisanja eky’omusanvu.

President Museveni ng’ayaniriza owa Somalia Hassan Shiekh Mohammed

Kuliko owa Democratic Republic of Congo, Felix Thishekedi , owa South Sudan Salva Kiir Mayadette ,owa Somalia Hassan Shiekh Mohammed, omumyuka w’omukulembeze wa Zimbabwe General Guveya Dominic Nyikadzino Constantino Chiwenga.

Abalala kuliko omukulembeze wa Sahrawi Arab Democratic Republic, Brahim Ghali , President wa Ethiopia Taye Atseke Selassie.

Abalala ye Nicholas Checker omukungu mu government ya America avunaanyizbwa ku nsonga za Africa, nga yakiikiridde omukulembeze wa America Donald Trump n’abalala bangi.

Buli mukulembeze atuuse mu ggwanga, asoose kugenda mu maka g’omukulembeze w’eggwanga Yoweri Kaguta Museveni okuwayaamu, era emboozi bagiseetudde neegwa amakerenda.

Abakulembeze abalala abavudde mu maqanga agenjawulo, kuliko Olusegun Obasanjo eyaliko president wa Nigeria, Uhuru Kenyata eyali omukulembeze wa Kenya, Manuel Osa Usue Nsua ssaabaminister wa Equatorial Guinea.#