President wa Uganda era omudduumizi w’amaggye owokuntikko Gen.
Yoweri Kaguta Museveni Tibuhaburwa asattuludde ekibinja ky’amaggye gokunnyanja ki fisheries protection Unit kyeyali yasaawo okulwanyisa envuba embi ku nnyanja, ababadde abadduumizi baakyo abawadde emirimu emirala.
Okugyawo ekibinja ky’amaggye gokunnyanja agabadde galwaanyisa envuba embi, kikolebwa nga kyesigamizza ku mivuyo egibadde gyetoolera mu ntambuza yaakyo ey’emirimu, okusinziira ku kunyonyola okuweereddwa Amaggye g’egwanga
Museveni obuvunanyizibwa bwokugyawo ekibinja ky’amaggye kino, abusigidde mutabani we era omudduumizi w’amaggye g’eggwanga,nga era yemuwabuzi we ku nsonga ezenkizo General Muhoozi Kainerugaba
Mu bbaluwa efulumiziddwa akolanga omwogezi wa UPDF, Col. Chris Magyezi, omukulembeze weggwanga era alagidde obukiiko bwokumyalo obumanyiddwanga Landing sites Committee nabwo bujjibweewo olw’emivuyo egibwetobeseemu.
President Museveni alagidde nti wakutondebwawo obukiiko obuggya obulimu abantu abawangaalira mu bitundu ebyo ebyenyanja n’abasiga ensimbi mu by’obuvubi.
Omumyuka w’omudduumizi w’amaggye g’eggwanga Lieutenant General Sam Okiding wamu nakulira ekitongole ky’amaggye ekikessi ki Defence Intelligence and Security, Major General Richard Otto bakwasiddwa obuvanyizibwa obw’okulambika okutondebwawo kw’obukiiko obwo, mu bbanga lyamyezi 3 gyokka.
Ekibinja ky’amaggye ki Fisheries Protection Unit, oluvannyuma lw’okusattululwa, kati kifuuliddwa ekibanja ky’amaggye ekye 155 ekituumiddwa Marine Battalion.
Kigenda kukakkalabiza emirimu gyakyo wansi w’obukulembeze bw’amaggye obwa UPDF Marine Brigade ekidduumirwa Brigadier Michael Nyarwa.
President Museveni alonze Maj. Joseph Ssebukeera okuddumiira ekibanja ky’emaggye kino ekiggya ekya 155 marines Battalion
Lieutenant Colonel Mercy Tukahirwa abadde omuddumiizi wa Fisheries Protection Unit, asindiikiddwa mu offiisi y’omuwabuzi womukulembeze w’eggwanga ku nsonga z’ebyokwerinda n’obutebenkevu Lieutenant General (Retired) Proscovia Nalweyiso, nga emirimu gyagenda okukola mu offiisi eyo tegirambuluddwa
Omukulembeze weggwanga mu mwaka 2016/17 yateeka amaggye ku nnyanja zonna okwetoolola eggwanga , nekigendererwa ekyokulwanyisa envubi embi gyeyalumiriza nti yali eviiriddeko ebyenyanja okukendeera, nga government yali tekyafunamu.
Wabula okuva lweyassa amaggye gano ku nnyanja wabaddewo okwemulugunya okuva ku bakulembeze ku nnyanja, abavubi n’abantu abalala abakolera emirimu ku mbalama z’ennyanja, ku mazzi nebirala, nti amaggye gabatuntuza, bagamba nti bannabwe bangi baluguzeemu obulamu abalala bapookya nebisago.#
