President Yoweri Kaguta Tibuhaburwa Museveni, awadde abagoba ba bodaboda mu Kampala n’emiriraano ensimbi obuwumbi bwa shs 10 n’obukadde 200, okuzikozesa okwekulakulanya n’okukuza amaka n’omulimu gwabwe.
President Museveni ssente bano azibaweredde mu kisaawe e Kololo, ku mukolo gyetongolezza SACCO z’abavuzi ba Bodaboda ezisoba mu 110 okwetooloola district okuli Kampala, Mukono ne Wakiso.
President Museveni bwabadde akwasa abagoba ba bodaboda bano ensimbi agambye nti wakufaafaagana naabafere n’ababulankanya ensimbi zaagaba okukulakulanya abantu babulijjo.
President ajulirizza n’ensimbi zeyasooka okuwa aba bodaboda mu SACCO zaabwe mu mwaka gwa 2011, zebagamba nti bangi tebaazifunako.
President Museveni abuuzizza ensimbi ezo gyezalaga nekyezaakola, era Mawejje Francis, ssentebe waaba bodaboda mu Uganda naamutegeeza nti ensimbi zaakwasibwa bantu bakyamu abataali mu mulimu gwabwe.
Waliwo abategeezezza nti ssente ezo ebiseera ebyo zaakwasibwa aba bodaboda abaali bakulirwa Kittatta Abdullah, eyali akulira ekibinja Kya Bodaboda 2010, era eyali ssentebe wa NRM mu ggombolola ye Rubaga.
President Museveni wano waasinzidde naawera okufaafaagana nababulankanya ensimbi zawa abantu baabulijjo okwekulakulanya, nezikomekkereza mu nsawo z’abantu ab’olubatu.
President Museveni mungeri yeemu alabudde aba bodaboda okwewala amakubo agookwewola gyebabasa abamagoba amangi nebatuuka nokubowa pikipiki zaabwe, nti naabawa amagezi nti bakozese SACCO zaabwe zebalimu ku magoba amatono agatasukka bitundu 6%.
Presidenr Museveni mu ngeri yeemu azeemu okkukaatiriza nti tagenda kukkiriza bantu kubba banna Uganda, era aweze okukolawo ekyenjawulo ku baaleega ebisale n’okukuba abantu engassi esukiridde, mu kiseera government lweyali ekozesa camera zokunguudo okukuba ebipapula ku bidduka naddala ebyalina number plate endigito.
Ssentebe wa bodaboda mu Uganda, Mawejje Francis, aweze nokwongera okukunga banne mu mirimu gyokwekulakulanya naddala nga bakozesa obuwumbi 10 n’obukadde 200 president bwabadde.
Mukusooka, omukolo guno gutaataganyiziddwa ekire ky’enkuba etandise okufudemba, nga president Museveni yakatuuka, era bangi ebaggwereddeko.
Oluvannyuma lw’enkuba okukya, omukolo gugenze mu maaso.#
Bisakiddwa: Ddungu Davis
