President wa Uganda Yoweri Kaguta Museveni Tibuhaburwa asiibudde ba minister be mu lukiiko lwaba minister olusembyeyo mu kisanja kino 2021-2026, lubadde mu Maka g’obwa president Entebbe.
Ba minister bano abasoba mu 80 abategekedde n’akabaga akabasiibula n’abeebaza olw’emirimu gyebakoze mu kisanja kino.
President Museveni mu bubaka bwatadde ku kibanja kye ekya X, agambye nti olukiiko lwaba minister be bano, lwerututte Uganda ku mutendera gw’ensi eziriko yadde yaddeko mu byenfuna emanyiddwanga Middle Income status.
President Museveni yalonda olukiiko lw’aba minister mu kisanja kino abaali batasuubirwa mu bifo mweyabateeka, era nategeeza eggwanga nti ba minister beyalonda bavubi, nti ye beyalabamu omulamwa okuddukanya government ye.
Mu kisanja kino ba minister babiri okuli Charles Engola Machadwog eyali minister omubeezi ow’ekikula ky’abantu avunaanyizibwa ku bakozi, ne Sarah Mateke eyali minister omubeezi ow’ebyokwerinda Omutonzi yabajjulula tebamazeeko kisanja kino, era nga minister Charles Engola omukuumi we yeyamwettira, yamukuba amasasi mu Makaage mwennyini
Museveni era mu kisanja kino, yasuula ba minister 3 okuli eyali ow’ebyokwerinda Vincent Bamulangaki ssempijja, gweyasikiza Jacob Oboth Oboth.
President era yasuula eyali minister w’e Karamoja Mary Goteth Kitutu ne minister we omubeezi eyali ow’ensonga z’e Karamoja Agnes Nandutu, nga bano ebyabazaalira akabasa kwekwezibika amabaati agaali ag’okuweebwa abawejjere e Karamoja. Nandutu Kooti yamusalidde emyaka 4 ng’ali mu nkomyo, wadde nga n’amabaati yagazaayo.
Museveni mu kisanja kino mweyakolera endagaano wakati wekibiina kye ki NRM ne DP, mweyalondera ssenkaggale wa DP Nobert MOa kubwa minister bwa ssemateeka n’obwenkanya, ng’ono werutuukidde olwaleero ng’alamuza bwa sipiika bwa parliament wadde nga parliament ejjuddemu aba NRM.
Mwami Museveni mu kisanja kino, era mweyalondera eyali omutegesi w’ebivvulu Balam Barugahare Ateenyi, nga minister omubeezi ow’ekikula ky’abantu avunaanyizibwa ku nsonga z’abavubuka okudda mu bigere bya Sarah Mateke kati omugenzi, gweyali atutte mu ministry y’ebyokwerinda
Museveni mu kisanja kino era yalonda munnamagye eyali omudduumizi w’eggye ly’eggwanga Gen.Wilson Mbasu Mbadi, nga minister omubeezi ow’ebyobusuubuzi, obuduumizi b’amaggye naabulonderamu mutabani we era omuwabuzi we ku bikwekweto eby’enkizo General Muhoozi Kainerugaba, omukulembeze w’ekisinde ky’ebyobufuzi ki Patriotic League of Uganda PLU.
President Museveni wakulayizibwa nga 12 May,2026 atandike ekisanja eky’omusanvu ekya 2026-2031, olwo addemu okulonda olukiiko lwa ba minister oluggya.
