Police ekutte abantu 4 okuli Nakacwa Jovia, Sebuliba Yahaya, Ndayizeyi Claude ne Kaababiito Sharon abateeberezebwa okubeera mu lukwe lw’okubba omwana owa wiiki 3, ayitibwa Ssentume Dylan.
Omwogezi wa police mu bitundu bya Wamala, Lameck Kigozi agambye nti nnyina w’omwana nga ye Ainembabazi Janet omutuuze ku kyalo Kitonzi A cell mu gombolola y’e Lubimbiri mu district ye Mubende yekubira enduulu ku police, ng’omwana we abbiddwa nga 25 April,2026.
Nnyina w’omwana agamba nti yali amulese munnyumba agende agule ebintu ku dduuka, agenda okudda ng’omwana taliiwo.
Yategeeza ku batuuze banne ne LC, abaamuwa amagezi okugenda ku police mu bwangu, era nayo neetandikirawo omuyiggo.
Lameck Kigozi agambye nti waliwo omutuuze eyabagulizza ku police nti olunaku omwana lweyabula, yalabako Ssebuliba Yahaya ewaka wa Ainembabazi Janet.
Police bweyakutte Ssebuliba kwekulonkoma Nakacwa Jovia omutuuze we Namagogo South Division mu Mubende Municipality, nti yamuwa sente amubbire omwana oyo.
Police yagenze mu maaso n’okunoonyereza era neetuuka ewa Ndayizeyi Claude muganzi wa Nakacwa Jovia, kwekumukwata ayambeko police mu kunoonyereza.
Ndayizeyi Claude yabuulidde police nti eby’okubba omwana yabadde tabimanyiiko, wabula naategeeza nti Nakacwa muganzi we era nti yamutegeeza nti alina olubuto lwe, era naye abadde alinze mwana.
Omukyala bamulinnye akagere okutuusa webaamukwatidde ku kyalo Kiruma nakyo ekisaangibwa e Mubende, mu maka ga Kaababiito Sharon era naye akwatiddwa.
Lameck Kigozi alabudde abawala n’abakazi abalimbalimba abasajja embuto okweddako.
Bisakiddwa: Ssebuufu Baanabakintu Kironde
