Police mu bitundu by’e Kira mu district y’e Wakiso enyiitirizza ebikwekweto okufeffetta n’okufuuza abamenyi b’amateeka abatigomya abatuuze n’abalamazi, ekutteyo abalala 30.
Abakwate bakukunuddwa mu bitundu by’e Kapeera Kimbejja ne Kyaliwajjala, nga bonna baggaliddwa mu kaduukulu ka Police ya Kira Division.
Omumyuka w’omwogezi wa Poliisi mu Kampala n’emiriraano, Luke Owoyesigyire agambye nti bano basangiddwa n’ebyambalo by’abebyokwerinda n’enjaga.
Mu ngeri yeemu, Owoyesigyire agambye nti nga bagoberera obutambi bwa kkamera za Police enkessi, bagudde mu buwuufu bw’abavubuka Mutebi Shafick n’abalala ababadde bakuba abantu obuggyo (Pavers) nebabanyagako ebyabwe.
Owoyesigyire ategeezezza nti ebikwekweto bino bikyayinda okutuusa ng’ekitundu kyonna kigogoddwa.
Bano abakwate begasse ku balala 15 abaasoose okukwatibwa mu kitundu kye Kira.
#
