Omuzannyi wa club ya Villa Jogo Ssalongo, Patrick Jonah Kakande alondeddwa ng’omuzannyi asinze banne okucanga endiba mu Uganda Premier League season ewedde 2023/24.
Omukolo gw’okutikkira abawanguzi engule gubaddewo mu kiro ekikeseza olwa nga 30 June,2024 era Patrick Jonah Kakande yasinze okuwangula engule okubadde n’engule ey’omuzannyi omuto asinze.
Kakande era awangudde engule ya Players Player of the season, ate era nalondebwa ku ttiimu yabazannyi 11 abasinze okucanga endiba.
Dusan Stonjanovic owa Villa Jogo Ssalongo ye mutendesi asinze, Vipers yesinze empisa nga bafuna kaadi ezakyenvu 33 n’emyufu 1, Yunus Ssentamu owa Vipers ye yateeba goolo esinze obulungi ate nga Muhammad Shaban owa KCCA yasinze okuteeba goolo enyingi 17.
Chrispus Musiima owa Kitara ye mukwasi wa goolo asinze, Ronald Otti owa BUL ye muzibizi asinze, Ronald Ssekiganda owa Villa Jogo Ssalongo ye muwuwutanyi asinze ate nga Abraham Tusubira owa Maroons yasinze okukola emikisa emingi egivamu goolo 10.
Villa Jogo Ssalongo ye yawangula liigi Season ewedde oluvanyuma lw’ebbanga lya myaka 20 nga tebawangula kikopo kino.
Bisakiddwa: Isah Kimbugwe
