Omusolo ku mafuta gwongeddwako shs 200
Parliament eyisizza omusolo ku mafuta gwa shillings 200 ku buli liita yamafuta okuli petro ne Diesel
Omusolo guno guli munnongosereza government zeyayanjula mu tteeka lya Excise duty.
Okuyisa omusolo ogwa shillings 200 ku buli liita yamafuta, kireetedde omusolo government gwesolooza ku buli liita y’amafuta okulinnya, okuva ku shillings 1,450 ku buli liita ya petulooli okutuuka ku Shillings 1750 buli liita.
Ate ku buli liita ya desiel omusolo gulinnye okuva ku shillings 1,230 okutuuka ku shillings 1’430 buli liita.
Omusolo guno, gulinnye mu kiseera nga eggwanga liri mu katuubagiro k’ebbula ly’amafuta, nga kumasuundiro g’amafuta agamu tegalina mafuta, songa naago agagalina gagatunda bbeeyi yawaggulu.
Liita kati essibwa mu mmotoka etundibwa wakati wa shillings 5300 ne 5500 buli liita ya petro, ate liita ya diesel etundibwa wakati wa shillings 5100 ne shillings 5300.
Parliament wabula ekendezezza omusolo government gweyabadde ettadde ku cement ogwa shillings 1000 buli kasawo ka cement okukka ku shillings 750.
Omubaka wa Kira Municipality annyonyodde nti abantu basaanye okufuna ennyumba basuleko obulungi, nga singa cement ayongerwako omusolo abantu tebajja kusobola kuzimba.
Omusolo kukukyusa obwannanyini ku ttaka;
Parliament mu mbeera yeemu egaanye omusolo gwa stamp duty okusoloozebwa ku kukyusakyusa obwannanyini ku ttaka, nga guno government yadde eyagala gwongezebwe okutuuka ku bitundu 3% okuva ku bitundu 1.5%.
Ababaka byagaanyi bagambye nti omusolo ogwekitundu 1.3% mungi nnyo, nga bano baasinzidde ku alipoota ekoleddwa omubaka wa munisipaali ye Kira Ibrahim sssemujju Nganda ewakanyiza omusolo guno.
Okuwera emmotoka enkadde
Okuwera emmokota enkadde ezisukka emyaka 15 okuva lwezaakolebwa okudda ku myaka 13 nakyo parliament ekigaanye. ababaka bagambye nti okuyisa omusolo guno kigenda kwongeza ebbeeyi y’emmotoka.
Alipoota eyababaka abatono eremesezza omusolo guno ogwa Traffic and road safety Amendment bill, essomeddwa omubaka omukyala owa district ye Mukono Hanifah Nabukeera.
Engoye Nkadde
Omusolo gwa import duty ku ngoye enkadde oba emivumba nagwo gwongeddwa n’ebitundu 30%.
Ababaka okubadde Ibramhim ssemujju Nganda, Hanifah Nabukeera, Nathan Nandala mafabi owa Budadiri West ne Brenda Nabukenya omubaka omukyala owa district ye Luweero, bagusimbidde ekkuuli nti okugwongeza kigenda kukalubya obulamu bwannansi abawangaalira ku ngoye enkadde abatasobola kugula ngoye mpya.
Omusolo gwa Environment tax ku ddagala ly’abantu n’ebisolo gugyiddwawo;
M tteeka lino erya import duty, parliament ekaanyizza ne government okuggyawo omusolo gwa environment tax ku bintu okuli eddagala ly’abantu n’ebisolo, saako edagala lyebiwuka erikolebwa wabweru w’eggwanga.
Omusolo ku mwenge oguva ebweru w’eggwanga gwongezeddwa;
Omusolo ku mwenge omuka okuli wine,whisks n’ebika ebirala ebiva ebweru w’eggwanga gwongeddwa okuva ku shillings 1,750 buli liita okudda ku shillings 3500 buli liita.
Business ezisasula EFRIS
Omutemwa gwa Business ezisasula omusolo gwa VAT mu nkola eya EFRIS gulinnyisiddwa okuva ku million 150 nga bwekibadde okudda ku million 300.
Business eziweza Capital owa million 300 mu nteekateeka eno, zezigenda okubeera n’enkola ya EFRIS.
Omusolo ku sukaali;
Omusolo ku sukaali nagwo gwongeddwamu shillings 100 buli kilo, okuva ku sillings 200 okudda ku 300 buli kilo.
Okuwandiisa Bodaboda kwongezeddwa ebbeeyi
Okuwandiisa obwannanyini bwa Bodaboda, omusolo gulinnye okuva ku shillings 200,000 okudda ku 500,000.
Parliament yakuddamu okukubaganya ebirowoozo ku misolo emirala ku Thursday nga 23 April,2026.
