District ye Gomba entongozezza enteekateeka ey’okugabira abatuuze ensimbi eza parish development model eziwera obuwumbi bwa shs 5, kyokka abantu 82 bokka beebafunye ssente ezo ku lunaku olusoose.
Omukolo ogw’okutongoza ensimbi zino gubadde ku kitebe Kya district ye Gomba ku kyalo Tondola Kanoni.
Abakulira enteekateeka eno mu Gomba bategeezezza nti abatuuze abalala bakwongera okusunsulwa okufuna ensimbi ez’okwekulaakulanya, nga buli omu awebwa akakadde ka shs kalamba.
Akulira enteekateeka ya Parish development model mu district ye Gomba Ssebabi William agambye nti abakulira enteekateeka ya PDM e Gomba balina okusoomoozebwa okwobutaba nabikozesebwa, naddala computer ne data omungi eyeetagisa okukola emirimu gyenkola eyo okuyita ku mutimbagano.
Ekirala, Ssebabi William ategeezezza nti babadde bategese okugabira ssente abatuuze 326 nti kyokka bawaddeko 82 bokka, nti olwokuba aba ministry ya ICT mu ggwanga baliko entegeka gyebakyatereeza ey’okuzza obuggya mu mpeereza y’okumutimbagano.
Bisakiddwa: Sserugo Patrick