Wazzeewo obunkenke mu wofiisi w’omuwaabi w’emisango gya Government ya Uganda (DPP) ,olw’omu ku bakozi mu wofiisi eno Fatumah Bbuye Nabiwemba okusangibwa ng’afudde mungeri etanategerekeka.
Nabiweemba abadde aweza egy’obukulu 47, ng’abadde mutuuze mu kitundu kye Wampeewo mu town council ye Kasangati mu district ye Wakiso.
Kigambibwa nti abadde amaze ennaku nga 4 nga talabikako ku mulimu gyakolera.
Omu kuba ddereeva mu wofiisi ya Ssaabawaabi w’emisango gya Government Hamuza Kabanda, yatuukiridde police nagitegeeza nti Nabiweemba abadde amaze ennaku 4 nga talabikako ku mulimu era nga tebamuwuliza.
Embeera eno yawalirizza police okugenda mu Maka ga Nabiweemba e Wampeewo, gy’abadde abeera obwomu, era asangiddwayo mu nnyumba nga mufu.
Kigambibwa nti omukyala ono mu mwaka gwa 2017, yabulako okumala omwezi mulamba, oluvannyuma n’azuuka.
Amyuka omwogezi wa police mu Kampala n’emiriraano Luke Owesigire agambye nti okunoonyereza kutandise era baliiko byebakuηηaanyizza mu nnyumba ebigenda okubayambako mu kunoonyereza ku musango guno.
Luke Owesigire ategezeza nti omulambo gwa Fatumah gutwaliddwa mu ggwanika okwongera okwekebejjebwa nga n’okunoonyereza bwekugenda maaso.
MU mwaka gwa 2015, Joan Kagezi eyali omuwaabi w’emisango gyagovernment yakubwa amasasi agaamuttirawo e Kiwaatule yali ayimiridde kwegulira mu bibala.
Emyaka 10 egiyiseewo omusango gw’okutta Kagezi gukyagenda mu maaso n’okuwulirwa, era nga waliwo n’abaali abakulu mu police abawerennemba n’emisango egyekuusa ku kuttibwa kwa Joan Kagezi.#
