Ng’Obuganda bwetegekera emipiira gy’ebika bya Baganda egy’omupiira ogw’ebigere egigenda okuggulwawo ku Saturday nga 03 May,2025 mu kisaawe e Wankulukuku, omukuku w’ekika kye Kinyomo, Omutaka Nakigoye Nabbimba Lukabya Samson, atongozza olukiiko olugenda okuddukanya ttiimu y’ekika okutandika n’empaka z’omwaka guno.
Omutaka Nakigoye Nabbimba Lukabya Samson olukiiko luno alutongoleza ku mbuga ya Buganda e Bulange e Mengo.
Olukiiko olubaddeko lumaze muntebe ebbanga lya myaka 5 okuva lwe balondedwa mu 2019.
Ssentebe omugya ye Yusuf Kigoye, omumyukawe ye Muwawu James, Namuwa Sylvia ye muwandisi, Ssenyomo Daniel ye Muwanika, ate nga Ntambaazi Lawrence ye mukunzi wa ttiimu.
Omutaka Nakigoye Nabbimba Lukabya Samson asabye bazzukulu be okuwa ttiimu y’ekika obuwagizi, era ttiimu eno yetaaga ensimbi obukadde obusoba mu 30 okusobola okuzannya omutendera gw’ebibinja mu mpaka z’omwaka guno.
Empaka z’ebika bya Baganda z’omupiira ogw’ebigere zigenda kuggulwawo ekika kye Ngabi Ennyunga nga ettunka ne Akasimba ku ssaawa 10 ez’olweggulo mu kisaawe e Wankulukuku.
Wabula wakusookawo semifinal ne final y’emipiira egy’okubaka, nga ku semifinal Ennyonyi Ennyange egenda kuzannya ne Ngeye ate nga Emmamba Namakaka egenda kuzuzumba ne Ngoonge.
Okuyingira mu kisaawe e Wankulukuku kwa shs omutwalo 10,000/= ne 20,000/=.
Bisakiddwa: Isah Kimbugwe
