Obwakabaka bwa Buganda butenderezza emirimu egyakolebwa Omugenzi owek. Herbert Hubert Kibuuka, olw`okuba omusajja eyali omukozi ennyo, eyayagala Obwakabaka bwe n`okubukolerera, yalina omwoyo gwa ggwanga, ate era yali alabira wala.
Olumbe lw’omugenzi Hubert Kibuuka lwabiziddwa mu maka ge e Kikaaya mu ssaza Kyadondo.
Rhino Syrus Hubert Kibuuka Mulyazzawo yasikidde Omugenzi Hebert Hubert Kibuuka, ate Anny Maria Nalunkuma Lubuga atuuziddwa nga Lubuga we .
Abantu abenjawulo bogedde ku mugenzi ng’omuntu eyali ow’enjawulo mu bintu byonna byeyakolanga.
Katikkiro wa Buganda eyawummula Owek Dan Muliika, agambye nti Omugenzi y`omu ku basajja abaali abagezi era abaalabiranga ewala, newankubadde ebimu ku byeyawabula government eya wakati yagaana okubitambulirako ekiviiriddeko eggwanga lino okugwa ku miteeru.
Ssentebbe wa board ya Cbs omukungu Mathias Katamba, atendereeza nnyo emirimu n`obuwereeza bw`omugenzi Engineer Herbert Hubert Kibuuka, nti era yakola nnyo mu kutandikawo radio CBS, wamu n`okulwana okulaba ng`ebeera ku ntikko ekintu kyeyatuukiriza obulungi.
Eyaliko minister w`Obuwangwa n’ennono mu Bwakabaka Owek. Denis Ssengendo, agugumbudde nnyo abantu abezunguwaza ebyaffe nebatuuka n`okubiyita ebyaffe ebya Sitan, agambye nti bano bebalabe b`obuwanggwa n’ennono, era naanenya abantu abaabizaawo ennyimbe ng’omuntu yakafa.
Minister omubeezi owa Mawulire ne technologiya mu government eyawakati, Owek. Joy Nabbosa Ssebuggwawo, omusika amusibiridde entanda ey`okutambulira obulungi mu linnya ly`omugenzi, aleme kumuswaza.
Ssentebbe w`olukiko olukulakulanya abantu ku radio y`omutanda Owek Alhajji Kaddu Kiberu, ayogedde ku mugenzi ng`omusajja eyagala Obwakabaka bwe wamu n`okubukolerera.
Omukulu wekika kye Ndiga Omuttaka Luwomwa Eng. Daniel Bossa, mu bubaka bwe obusomeddwa Katikiro wekika kino Eria Lwasi Buuzawo, ayogedde ku mugenzi ng`abadde omusajja empagi Luwaga mukika Kyabwe.
Msgr Gerald Kalumba bwanamukulu wa Christ the King, bwabadde akulembeddemu ekitambiro kya mmisa, ayogedde ku mugenzi nga mukama gweyali yawa ebitone ebyenjawulo era byeyakozesa obulungi mu kiseera kye eky`obulamu.
Bisakiddwa: Musisi John