Ministry y’ebyenjigiriza n’emizannyo ewabudde abakulira amasomero okuba abeerufu nga bawandiika abayizi abagenda okusoma S.1, nti baleme abamu kubasuula ebbali, olw’ekigendererwa eky’okugtunda ebifo. olwokwagala okubakolamu ensimbi.
Kigambibwa nti waliwo amasomero agagaana okuwa abayizi abamu ebifo nga baagala ku bitunda, sso nga abaana abo babeera n’obubonero obubatwala mu masomero ago.
Ministry yeebyenjigiriza egamba nti amasomero agamu geekwasa nti galiko obubonero bwegakomako n’omuwendo gwebatwala kyokka nti abamu tebabawa bifo, olwekirubirirwa eky’okubiguza abalina ensimbi ate ng’abaana babwe baafauna obubonero bwawaggulu.
Amasomero ga Secondary okwetolola ebitundu byeggwanga ebyenjawulo gakumala ennaku 2 nga gasunsula abayizi abanatwalibwa mu S.1, abaayise ebigezo bya UNEB eby’omwaka oguyise 2025.
Abayizi abasoba mu mitwalo etaano mu kakaaga bebalina obusobozi okwegatta ku masomero ga secondary oba amatendekero ageemikono omwaka guno, oluvanyuma lwokufuna obubonero obubongerayo.
Bbo abayizi emitwalo ejikunukkiriza mu 9 ssibakweyongerayo olw’obutayita bigezo ate abamu tebaabituula.
Minister omubeezi oweebyenjigiriza avunanyizibwa ku matendekero agawaggulu, Dr JC Muyingo, nga yaakikiridde minister w’ebyenjigiriza n’emizanyo era mukyala w’\omukulembeze weggwanga Janet Kataaha Museveni, mu kuggulawo omukolo ogwokusunsulamu abayizi mu kibangirizi kya banamakolero e Lugogo, agambye nti wasaanawo obwerufu mu nteekateeka y’okuwa abayizi ebifo mu masomero gonna kagabe ga bwananyini.
Dr .JC. Muyingo mu ngeri yeemu alabudde amasomero obutawandiisa abayizi abangi olwokwagala okubakolamu ensimbi sso nga amasomero tegalina wakubateeka, nobutawandiisa baana mu bisulo nga tebalina lukusa lwakubasuza okuva mu ministry y’ebyenjiriza.
Ssentebe w’akakiiko akavunanyizibwa ku byenjigiriza mu parliament Nathan Itungo, asinzidde wano naalabula amasomero okugoberera enkola yebisomesebwa empya baleme okutaataaganya abayizi.
Bisakiddwa: Ddungu Davis
