President wa Uganda Gen.Yoweri Kaguta Museveni Tibuhaburwa asuubizza abavubuka nti amakolero agasoba mu 5000 agatandikiddwawo mu ggwanga n’amalala agakyajja, gakusobola okubawa emirimu, singa banaafaayo n’okukkiriza okukola amasomo agatuukana n’embeera n’enkola y’emirimu eriwo.
President Museveni abadde ku ssomero lya Nkoyooyo boys primary school Matale mu district ye Buikwe, mu kukuza olunaku lw’ensi olw’abakozi olwa 2026.
Presidenr Museveni agambye nti wakyaliwo abavubuka abasoma amasomo mu mateendekero agawaggulu, agetaagibwa abantu abatono mu nkuulakulana y’ebitongole, ekirese abavubuka bangi nga tebalina mirimu.
Anokoddeyo amasomo nga aga produrement, SWASA,Community pshychology n’amalala.
Abagambye nti abavubuka tebalina kusuulirira emirimu ng’okufumba kubanga abantu balya mu kadde, egy’ebyobulimi n’emirala.
President Museveni abakubirizza okweyambisa ensimbi government zeteeka mu Ppulogulamu z’ebyenkulaakulana omuli Parish Developement Model, Emyooga n’emirala mu kifo ky’okugenda mu bawozi b’ensimbi ababasaba amagoba agali waggulu naabagamba nti beenenyanga bokka.
President era alabudde abantu abakyagugubidde mu ntobazi nga balimiramu n’okuzimbamu nti omukono ogw’ekyuma gwakubakwatako.
Abakozi 50 baweereddwa emidaali egibasiima, ng’abasiinga obungi bavudde mu bitongole ebikuuma ddembe, naddala abo abaweerezza eggwanga obuteebalira okumala emyaka egisoba mu 20.
Ye Minister w’ekikula gy’abantu Betty Among ategezezza omukulembeze w’eggwanga nti werutuukidde olwaleero nga banna Uganda banyiikidde okukola okukyusa obulamu bwabwe, bakola emirimu gyabwe olw’emirembe ejiri mu ggwanga lino.#
