Obululu bw’empaka z’omupiira ogw’ebigere eza Stanbic Uganda Cup obw’omutendera gwa quarterfinal bukwatiddwa, Vipers akalulu kajisudde ku Kitara FC.
Omukolo gw’okukwata obululu gubadde ku kitebe kya FUFA e Mengo mu Kampala, gukoleddwa eyaliko emunyenye ya Uganda Cranes Tonny Mawejje.
Bannantamegwa ba Uganda CUP aba Vipers akalulu kabasudde ku club ya Kitara FC.
Vipers y’egenda okukyalira Kitara e Masindi.
Kitara mu kiseera kino yekulembedde Uganda Premier League. Okutuuka ku mutendera guno Kitara yawandulamu Villa Jogo Ssalongo ate Vipers yawandulamu Iganga Young.
Akalulu akalala, BUL abaawangula ekikopo emyaka 2 egiyise egenda kuttunka ne KCCA eyakawangula ebikopo bino emirundi 10.
Mungeri club ya Police egenda kuzannya ne NEC ate nga Pajule Lions egenda kuttunka ne Pakwach Young.
Emipiira ku mutendera guno ogwa quarterfinal gigenda kuzanyibwa ku mwetoloolo gwa round emu ewatali kuddingana, nga singa ttiimu ziremagana mu dakiika 90, edakiika 30 zijja kwongerwamu okutuuka mu Peneti.
Emipiira gino gigenda kuzanyibwa wakati w’ennaku z’omwezi 10 ne 14 ogwa April,2024.
Bisakiddwa: Isah Kimbugwe