Ekibiina ki National Unity Platform mu butongole kisabye government eyanjule mu parliament okulambika okw’etteeka erifuga ebibiina byobufuzi ebiri mu mukago gwa IPOD, kiyambeko NUP okusalawo okugwegattako.
Parliament mu May 2025, yayisa ennoongosereza mu tteeka erifuga ebibiina byobufuzi, nekifuulibwa kyabuwaze eri ebibiina government byewa ensimbi mu mukago gwa IPOD, okusooka okukola endagaano ekifuula ki memba.
Minister wa ssemateeka nessiga eddamuzi Nobert Mao yayimirizza ensimbi ezaalina okugenda mu bibiina ebirina ababaka mu parliament,okutuusa ng’amalirizza okubaga okulambika okugenda okuluηamya ensimbi ezo governmenr zeewa ebibiina.
Akulira oludda oluvuganya government mu parliament era omwogezi w’ekibiina ki NUP Joel Ssenyonyi, abadde mu parliament naasaba government egitwalire ennambika eyo, kisobozese ekibiina kye okusalawo okwegatta ku IPOD, nti kubanga kirabika kyafuuka kyabuwaze.
Amyuuka Ssaabawolereza wa government Jackson Kafuuzi agambye nti government okulambika okwo ekyakubaga, era asabye baweebwe obudde bamalirize omulimu ogwo
NUP yali yagaana omwegatta ku mukago gwa IPOD, wabula ng’ensimbi abadde azifuna kubanga tekibadde kyabuwaze okugubeeramu.
Government buli mwaka ewa ebibiina byobufuzi obuwumbi bwa shs45 okuyita mu kakiiko k’ebyokulonda, nga zigabanyizibwa okusinziira ku muwendo gw’ababaka buli kibiina gwekirina mu parliament
Ekibiina ki NRM kyekisinga okutwala omutemwa omunene, kitwala obuwumbi obusoba mu 30 buli mwaka ,NUP neddako nga buli mwaka efuna obuwumbi 5 n’obukadde 700, ebibijna ebirala okuli FDC, DP, UPC, Jeem,PPP nebigoberera.
Mu kiseera kino ebibiina ebifuna ensimbi ezo biri mu kattu, olwensimbi ezo minister Nobert Mao okuziyimiriza.
Obuwumbi 11 butudde mu kakiiko k’ebyokulonda, tezisindiikibwa eri bibiina byobufuzi okutuusa lwalimaliriza okubaga okulambika okwo.
Mu kiseera kino nga ebbuggumu lyebyobufuzi lyeyongera olwakalulu akabindabinda, ebibiina byesanze mu kusoomoozebwa olwobutaba na nsimbi ezivugirira abantu baabyo abeesimbyewo.#
