Omwepisikoopi w’essaza ly’e Kiyinda Mityana Rt. Rev. Dr. Joseph Anthony Zziwa awadde bannaddiini 6 Obusasoolodooti, Obudyankoni 6 ne Abasebinaaliyo 8 bafunye emiruka ogw’obusomi n’Obuweereza
Omukolo guyindidde ku Lutikko ya Noah Mawaggali mu Kiyinda Mityana.
Abafunye Obusesredooti ye; Rev Fr Peter Bukya ava mu kigo ky’e Ssenkulu, Rev Fr John Francis Kalungi ava mu kigo ky’e Kyengeza, Rev Fr Paul Luzze okuva e Mubende, Rev Fr John Ssekiziyivu okuva mu kigo ky’e Kyamasansa, Rev Fr John Ssemakula okuva e Maddu, ne Rev Fr Charles Sserunkuuma okuva e Maddu.
Abaweereddwa Obudyankoni ye; Rev Dcn Richard Kalyango , Kiyaga Onesimus , Mubiru Aloysius, Benard Sseggane, John Baptist Ssekyanzi ne Denis Ssewanyana.
Bwabadde ayigiriza mu Mmisa gyagabiddemu Essakramentu lya Olodiini, Dr Joseph Anthony Zziwa awabudde abasuumuusiddwa okunywera mu buweereza bweboolekedde n’okwewala emisege egibalinze okubataagula n’okubalemesa okutuukiriza okuyitibwa kwabwe.
“Mukuume bulungi eggana lya Katonda, ebiseera byetulimu, emisege mingi, gyogera ate olulimi lwagyo lusikiriza, girina ssente ….kikafuuwe okutwalibwa emisege olwo ani anaasumba endiga?” Bishop Zziwa
Abategeezezza nti basaanye Okubeera nga Kristu Omusumba omulungi nga bategeera endiga zaabwe olwo nazo zisobole okubategeera.
Abasabye baleme kutya newankubadde boolekedde olusozi gambalagala nabasaba beekwate Katonda byonna bajja kubiwangula.
“Katonda y’ayita, y’alonda era y’atuma omuntu okukola ogw’obusumba, Kale tasobola kumwabulira…”
Ategeezezza nti Obusasolodooti busimbye ku mpagi ssatu okuli; Obumalirivu, Okwewaayo n’Okufuba bwatyo n’abasaba ebyo babikwate butiribiri.
Omu ku bazadde b’abasaasredooti abagole omwami wa Kabaka ow’essaza Busujju era nga ye kitaawe wa Rev.Fr.John Francis Karungu, Kasujju Jjingo Mark Kaberenge yeebazizza Katonda abawadde ekkula ly’Omusaasredooti mu nju yaabwe.
Emmisa eno yeetabyemu Abassaasredooti kyenkana bonna ab’essaza ly’e Kiyinda Mityana, abamu okuva mu masaza amalala, Owek Joseph Kawuki minister omubeezi owa government ez’ebitundu mu bwakabaka bwa Buganda, bannaddiini abalala n’abantu ba Katonda abalala bangi.
Bisakiddwa: Kamulegeya Achileo K