Olukiiko oluteekateeka empaka za masaza ga Buganda ez’omupiira ogw’ebigere lukakasiza ensengeka y’emipiira egy’omutendera gwa quarterfinal oluvanyuma lw’omutendera gw’ebibinja okukomekerezebwa.
Ku quarterfinal Buvuma egenda kuttunka ne Mawokota, Gomba egenda kuzuzumba ne Ssingo, Bulemeezi egenda kuttunka ne Buwekula ate nga Kyadondo egenda kuttunka ne Buddu.
Oluzannya olusooka olwa quarterfinal lwakubeerawo nga 17 September,2023 ate okuddingana kubeerewo oluvannyuma lwa wiiki emu.
Ku mutendera gw’ebibinja, Ssingo yayiseewo nga ekulembedde ekibinja Bulange n’obubonero 19, Buvuma n’eyitamu mu kifo eky’okubiri n’obubonero 16, Bulemeezi n’eyitamu nayo mu kifo eky’okusatu n’obubonero 15.
Busujju, Butambala ne Bugerere baawanduse.
Mawokota nayo yayiseewo nga ekulembedde ekibinja Muganzirwazza n’obubonero 17, Gomba n’eyitamu mu kifo eky’okubiri n’obubonero 16 olwo Kabula, Mawogola, Busiro ne Ssese ne bawanduka.
Buweekula eyiseewo nga ekulembedde ekibinja Masengere n’obubonero 20, Buddu n’eyitamu mu kifo eky’okubiri n’obubonero 16, Kyadondo n’eyitamu mu kifo eky’okusatu n’obubonero 15, olwo Kyaggwe, Buluuli ne Kkooki ne bawanduka.
Bisakiddwa: Isah Kimbugwe
