Abaakuliramu omulimu gw’okuyooyoota Lutikko y’e Lubaga ng’ejaguza emyaka 100 kasookedde etukuzibwa, bategeezezza nti ku nsimbi obuwumbi bubiri n’obukadde bina (shs 2.4 b) bwebeetaaga mu nteekateeka zino, baakafunako ensimbi ebitundu 60%.
Okulangirira bwebati babadde balambuza abakulu abakulembeddwamu Vicar General w’essaza ekkulu Kampala Msgr. Rogers Kabuye Mukasa, Chancellor Rev Fr. Dr. Pius Male Ssentembwe n’abalala, omulimu gw’okuzimba ekifo awanaasimbibwanga emmotoka wamu n’okuddaabiriza oluggya n’okuyooyoota lutikko yonna wegutuuse.
Ssentebe w’olukiiko oluteekateeka byonna, Eng. Pius Mugerwa Mugalaasi agambye nti ssinga bafuna ensimbi nga bwebaazisaba, olunaku lwa 26 October,2025 olw’ekijaguzo werunaatuukira byonna bijjakuba biwedde.
Wadde terubadde lwa kulamaga nga bwebadde ebeera enkola buli Lwakusatu mu wiiki, waliwo abakristu abaleese ettu.
Aba Parish ya St. Kizito Kibiri baleese ensimbi obukadde busatu, omukadde Nabukalu Daatiiva okuva mu ssaza ly’e Masaka, Akulira Enzikiriza ya Budha mu Uganda The Most Ven. Kaboggoza Budhalakitha akakadde kamu, era ng’ono yoomu ku baana ba Kaggo omuwummuze omugenzi Owek. Toofiri Kivumbi Malookweza.
Mu ngeri ey’enjawulo abakulira akakiiko akanoonya ensimbi banjudde ennamba ya Merchant okuva mu MTN, abalina obuyambi kwebayinza okubuyisa eri 401248 Kampala Archdiocese ne Account mu Centenary Bank 3100117179 Lubaga Cathedral 100 years.
Abakristu banaajaguza emyaka 100 egya Lutikko y’e Lubaga nga 26 October,2025.
Bisakiddwa: Kamulegeya Achileo Kiwanuka.
