Emykq giweze 100 ne ddu, bukyanga Lutikko ya St.Mary’s Cathedral Lubaga ezimbibwa netukuzibwa mu 1925.
Lutikko eno etudde ku ttaka eryawebwayo Obwakabaka bwa Buganda, era mu kifo kino wewaali olubiri lwa Kabaka Muteesa I.
Emissa n’emikolo egy’okwebaza Katonda olw’ekkula lya Lutikko jikuziddwa nga 26 October,2025.
Kubaddeko n’okujaguza emyaka 59 bukyanga essaza ekkulu erya Kampala litongozebwa.
Ssaabasumba wa Kampala Paul Ssemogerere ategeezezza nti mu myaka 100, lutikko eno bangi bagifuniddemu essanyu omuli obufumbo obutukuvu, abafunye obusasorodooti, ababatiziddwa, n’essaala ezikyusizza obulamu bw’abwe.
Ebikujjuko by’okuweza emyaka 100 egya lutikko y’e Lubaga bibaddeko okutongoza emirimu egyenjawulo egigenda okuyambako eklezia okwongera okufunamu ensimbi.
Ekkaddiyizo ly’ebintu eryatuumiddwa Kabaka Muteesa I Memmorial Catholic Museum lyeryasoose okutongozebwa.
Mu ngeri yeemu Ssaabasumba Paul Ssemogerere atongozza ekifo awagenda okusimbibwa emmotoka okumpi ne Lutikko, Asimbye Omuti gw’Omuvule ku lutikko, okutongoza Ennyumba y’Abasasolodooti okuli Libraly , Ekisenge omukolerwa Dduyiro( GYM) Ebisenge ebisulwamu Abasasseredooti ne wofiisi z’Essaza.
Ku mukolo guno ogw’okujaguza emyaka 100, egya lutikko ye Lubaga, Ssaabasajja Kabaka Ronald Muwenda Mutebi II alagidde nti enkolagana wakati w’Obwakabaka ne Eklezia Katulika eyongere okunywezebwa.
Omutanda era asabye eklezia obutakoowa mu kaweefube waayo ow’Okulwanyisa okusosola n’Ekityoboola ddembe lya Buntu akigende mu maaso mu ggwanga.
Obubaka bwa Ssaabasajja abutisse Katikkiro wa Buganda Charles Peter Mayiga, era Empologoma yebazizza Eklezia olw’Okufa ennyo ku mbeera z’Abantu n’Eddembe lyaabwe wamu n’Obutava ku mazima.
Ssaabasajja alagidde bannaddiini okubeera abasaale mu kutaasa abavubuka obutatwalibwa muyaga gwa byabufuzi, era ewengayo obudde okukubaganya ebirowoozo ku ngabanya y’Ebyobugagga bw’Ensi Uganda.
President wa Uganda Gen Yoweri Kaguta Museveni Tibuhaburwa y’abadde omugenyi omukulu, atenderezza nnyo abakulembeze mu Eklezia Katolika abakulembeddemu Olutalo lw’Okulwanyisa Obwavu nga balima Emmwanyi n’Okulunda.
President yeyamye okukwasizaako bannaddiini abayamba ku Bantu okuva mu Bwavu.
President Museveni yebazizza Eklezia olw’Okulyowa emyoyo entakera n’Okwenyigira mu nteekateeka z’Enkulaakulana ezenjawulo, kyokka naasaba abantu ba Katonda Obutakoowa kugikwasuzaako mu mbeera zonna.
Ssabasumba w’Essaza ekkulu erye Kampala Paul Ssemogerere, mu maaso g’Omukulembeze w’Eggwanga yennyamidde olw’Ekibba ttaka ekisukkiridde mu ggwanga ekituuse n’Okutwaliramu Ettaka lya Eklezia, nekiziηamya enkulaakulana, naasaba president okubaako kyakolawo.
Ssabasumba mu ngeri eyenjawulo asabye abakwatibwako mu government n’Ebitongole ebikuuma ddembe,obuteenyigira mu kityoboola ddembe lya Buntu, naddala mu kiseera nga eggwanga lyolekera Akalulu ka bonna aka 2026.
Ssabakristu w’Essaza lye Kampala Emilly Kitto Mwaaka wamu ne ssentebe w’Olukiiko oluteseteese ebikujjuko by’Emyaka 100 gya Lutikko Eng Pius Mugalaasi Mugerwa, ng’ali wamu n’Omwogezi w’Olukiiko oluteeseteese emikolo Omuk John Fred Kiyimba Free Man, bebazizza abantu ba Katonda abawagidde enteekateeka zino.
Omukolo guno gwetabiddwako Abalangira n’Abambejja, Katikkiro wa Buganda eyawummula Owek Dan Muliika, Owek Amb Emmanuel Ssendawula, omukubiriza w’Olukiiko lwa Buganda Owek Patrick Luwaga Mugumbule, ba minister b’Obwakabaka abaliko n’Abaawummula, n’Abaami b’Amasaza.
Mu government eya wakati Ssabaminister Robina Nabbanja abaddewo, Owek JC Muyingo minister omubeezi ow’ebyenjigiriza ebyawaggulu , Minister wa Kampala Hajat Minsa Kabanda, minister Justine Kasule Lumumba , Ababaka mu lukiiko lw’Eggwanga olukulu , ba ssentebe ba district n’Abantu abalala bangi ddala ababadde bakwatiridde ku lutikko.
Bannaddiini abeetabye mu kitambiro ky’Emmisa kino mubaddemu Omubaka wa Paapa eyawummula Ssabasumba Dr. Augustine Kasujja, Omusumba w’Essaza lye Masaka Kitaffe Siverus Jjumba, Ssaabalabirizi w’Ekkanisa ya Uganda Kitaffe mu Katonda Samuel Steven Kazimba Mugalu, Prof Sheikh Muhammad Kiggundu ku lwa Supreme Mufti n’Ebikonge ebirala bingi.
Bisakiddwa: Kato Denis ne Kawuma Masembe
